دہلی: لذیذ پکوانوں کے لطف اور عید کی خریداری کے لیے مشہور ہو چکا ہے جعفرآباد کا بازار 

نئی دہلی: رمضان المبارک کا آخری عشرہ چل رہا ہے جس کے چند ایام اب باقی رہ گئے ہیں۔ لوگ اب عید الفطر کی تیاریوں کے لیے بازاروں کا رخ کر رہے ہیں۔ یوں تو ملک کی راجدھانی دہلی میں کپڑوں اور دوسری ضروریات کے سامان کے لیے قرول باغ، لاجپت نگر، ٹینگ روڈ، سینٹرل مارکیٹ، گاندھی نگر مارکیٹ جیسے بہت سے بازار ہیں، لیکن بڑھتی ہوئی مہنگائی میں لوگوں کے بجٹ کے مطابق جعفرآباد مین روڈ پر لگنے والا عید کا خاص بازار مناسب قیمتوں پر عید کی خریداری کے لیے نہ صرف دہلی بلکہ آس پاس کی ریاستوں میں بھی کافی مقبول ہو چکا ہے۔ اس بازار میں مرد و خواتین، بچے و بوڑھے اور جوان ہرعمر کے لوگوں کے لیے مختلف اسٹائل کے کرتا پائجامہ، جینس، شرٹ، جوتے، چپل، کولہاپوری چپل، مختلف قسم کے عطر وغیرہ ایک عام انسان کے بجٹ کے حساب سے دستیاب ہیں۔

اس بازار میں شام سے لے کر صبح سحری تک رونق نظر آتی ہے اور ایسا لگتا ہے کہ جیسے ایک نیا دن یہاں نکل آیا ہو۔ عید کی خریداری کے ساتھ عمدہ کھانوں سے اگر آپ کو لطف اٹھانا ہے تو جعفرآباد کا یہ بازار ہر کس و ناکس کے لیے کافی پسند آنے والا ہے۔ بازار میں کھانے پینے کی بھی دکانیں دیر رات تک کھلی رہتی ہیں۔ جعفرآباد مین روڈ پر لگنے والے اس بازار میں میٹرو پنک لائن جعفرآباد میٹر واسٹیشن اور سیلم پور میٹرو اسٹیشن یلو لائن سے بہ آسانی پہنچا جا سکتا ہے۔

بازار میں کپڑوں و جوتوں کے علاوہ ہر قسم کے عطر کی کئی دکانیں اور اسٹالز موجود ہیں۔ کاٹن ہاٹ نامی دکان کے مالک شریف احمد نے بتایا کہ اس بازار کی خاص بات یہ ہے کہ اگر کسی شخص نے اپنا کرتا وقت پر نہیں سلوایا ہے تو وہ اس بازار سے چھوٹے بڑے ہر سائز کا ریڈیمیڈ کرتا خرید سکتا ہے۔ بازار میں مختلف کپڑوں کی اقسام موجود ہیں اور ہر شخص اپنی پسند کے مطابق کپڑا خرید سکتا ہے۔ انہوں نے یہ بھی بتایا کہ نوجوان زیادہ تر چائنیز کپڑا خرید کر کرتا سلوا رہے ہیں۔

اس بازار میں ایک جوتے کی دکان چلانے والے محمد جنید نے بتایا کہ عید کے موقع پر چپلوں کی طلب بہت بڑھ جاتی ہے، اس لیے ہم نے دکان میں 300 روپے سے لے کر 1500 روپے تک کی چپلیں دستیاب کی ہیں۔ اس کے علاوہ جوتوں کی بھی کافی اقسام ہماری دکان پرصارفین کو مل جائیں گی۔

عطر فروش محمد انس کا کہنا ہے کہ عید کے مبارک موقع پر نئے کپڑے ہوں اور عطر نہ لگایا جائے تو عید ادھوری ہی تصور کی جائے گی۔ ہمارے پاس لوگوں کے مزاج کے مطابق کئی طرح کے عطر موجود ہیں۔ اس سال چونکہ موسم نہ گرم ہے، نہ سرد، اس لیے زیادہ تر لوگ عود، گلاب، خص وغیرہ ٹھنڈی تاثیر والے عطر زیادہ پسند کر رہے ہیں۔

جعفرآباد مین روڈ پر لگنے والے اس بازار میں کھانے کی بھی کئی دکانیں اور اسٹالز لگے نظر آ جاتے ہیں۔ اس روڈ پر یامین کی بریانی، اسلام ڈیری کا ٹھنڈا دودھ، شاہی ٹکڑے، ربڑی، حلیم، نواب کے کباب کافی مشہور ہیں، جن سے یہاں خریداری پہنچنے والے خوب لطف اندوز ہو رہے ہیں۔