تیل قیمتوں میں آگ: دہلی اور کولکاتا میں بھی پٹرول کی سنچری مکمل، ممبئی میں 106 روپے سے تجاوز

نئی دہلی: ممبئی اور چنئی کے بعد اب دہلی اور کولکاتا میں بھی پٹرول کی قیمت 100 روپے فی لیٹر کو عبور کرگئی ہے۔ آئل مارکیٹنگ کمپنیوں نے آج ملک کے چار بڑے میٹرو میں پٹرول کی قیمت میں 39 پیسے اور ڈیزل کی قیمت میں 23 پیسے کا اضافہ کیا ہے۔

معروف آئل مارکیٹنگ کمپنی انڈین آئل کارپوریشن کے مطابق دہلی میں پٹرول کی قیمت 35 پیسے اضافے کے ساتھ 100.21 روپے فی لیٹر ہوگئی۔ یہ پہلا موقع ہے جب قومی دارلحکومت میں غیر برانڈیڈ پٹرول 100 روپے فی لیٹر مہنگا ہوگیا ہے۔ اسی طرح ڈیزل کی قیمت بھی 17 پیسے اضافے سے 89.53 روپے فی لیٹر ہوگئی۔

پٹرول اور ڈیزل کی قیمتوں میں اضافے کا موجودہ سلسلہ 4 مئی سے شروع ہوا۔ دہلی میں مئی اور جون میں پٹرول 8.41 روپے اور ڈیزل 8.45 روپے مہنگا ہوا تھا۔ جولائی میں پٹرول کی قیمت میں 1.40 روپے اور ڈیزل کی قیمت میں 35 پیسے فی لیٹر اضافہ ہوا ہے۔ کولکاتا میں بھی پٹرول 39 پیسے مہنگا ہوگیا اور فی لیٹر 100.23 روپے تک پہنچ گیا۔ وہاں ڈیزل کی قیمت میں 23 پیسے کا اضافہ ہوا اور ایک لیٹر ڈیزل 92.50 روپے فی ڈالر میں فروخت ہوا۔

ممبئی میں پٹرول کی قیمت میں 32 پیسے اور ڈیزل کی قیمت میں 18 پیسے کا اضافہ کیا گیا۔ اب پٹرول 106.25 روپے اور ڈیزل 97.09 روپے فی لیٹر ہوگیا ہے۔ چنئی میں، پٹرول 31 پیسے مہنگا ہوکر 101.06 روپے اور ڈیزل 15 پیسے اضافے سے 94.06 روپے فی لیٹر ہوگیا۔ پٹرول اور ڈیزل کی قیمتوں کا روزانہ جائزہ لیا جاتا ہے اور اسی بنا پر روزانہ صبح 6 بجے سے نئی قیمتوں پر عمل درآمد ہوتا ہے۔

آج ملک کے چار میٹرو میں پٹرول اور ڈیزل کی قیمتیں حسب ذیل ہیں۔

شہر کا نام —— پٹرول روپے / لیٹر —— ڈیزل روپے / لیٹر

دہلی ————— 100.21 —————— 89.53

ممبئی ۔————— 106.25 ————— 97.09

چنئی ————— 101.06 -————— 94.06

کولکاتا ———— 100.23 —————— 92.50