ایل پی جی نے تہوار سے پہلے دیا جھٹکا، کمرشل سلنڈر کی قیمت میں اضافہ

نئی دہلی: دسہرہ اور دیوالی جیسے تہواروں کے موسم میں عام لوگوں کو اس وقت جھٹکا لگا جب بدھ یعنی یکم اکتوبر 2025 سے ایل پی جی مہنگی ہو گئی۔ پٹرولیم کمپنیوں نے 19 کلو والے کمرشل سلنڈر کی قیمت میں 15 روپے کا اضافہ کیا ہے، جبکہ گھریلو 14 کلوگرام والے سلنڈر کی قیمت میں کسی بھی قسم کی تبدیلی نہیں کی گئی ہے۔

اعداد و شمار کے مطابق، دہلی میں اب 19 کلوگرام کا کمرشل سلنڈر 1595.50 روپے کا ہو گیا ہے جو پہلے 1580 روپے میں دستیاب تھا۔ اس طرح صارفین کو 15.50 روپے اضافی دینے ہوں گے۔ کولکاتا میں یہ سلنڈر 1700 روپے کا ہو گیا ہے، جو گزشتہ ماہ 1684 روپے میں ملتا تھا۔ ممبئی میں قیمت 1531.50 سے بڑھ کر 1547 روپے اور چنئی میں 1738 روپے سے بڑھ کر 1754 روپے ہوگئی ہے۔ ان چار بڑے شہروں میں اوسطاً 15 سے 16 روپے کا اضافہ درج ہوا ہے۔

تاہم گھریلو 14 کلوگرام والے سلنڈر کی قیمت جوں کی توں برقرار ہے۔ ملک کے بیشتر شہروں میں گھریلو ایل پی جی 850 روپے سے 960 روپے کے درمیان دستیاب ہے۔ دہلی میں اس کی قیمت 853 روپے، ممبئی میں 852.50 روپے، لکھنؤ میں 890.50 روپے، احمد آباد میں 860 روپے، حیدرآباد میں 905 روپے، وارانسی میں 916.50 روپے، غازی آباد میں 850.50 روپے اور پٹنہ میں 951 روپے درج ہے۔

دریں اثنا، اتر پردیش کی یوگی حکومت نے اعلان کیا ہے کہ ریاست کی 1.85 کروڑ خواتین کو دیوالی سے پہلے مفت گھریلو سلنڈر فراہم کیا جائے گا۔ یہ فیصلہ اجولا اسکیم سے جڑی خواتین کو براہ راست فائدہ پہنچانے کے لیے کیا گیا ہے۔

ادھر مرکز نے بھی تہواروں کے موسم میں بڑا اعلان کرتے ہوئے کہا ہے کہ نوراتر کے دوران 25 لاکھ نئے وزیراعظم اجولا کنیکشن دیے جائیں گے۔ اس فیصلے سے ملک میں اجولا کنیکشن کی مجموعی تعداد بڑھ کر 10 کروڑ 60 لاکھ تک پہنچ جائے گی۔ حکومت کا ماننا ہے کہ اس اقدام سے خواتین کو ایندھن کی قیمتوں میں اتار چڑھاؤ کے باوجود بڑی سہولت ملے گی اور لکڑی یا دیگر ذرائع پر انحصار کم ہوگا۔