مہنگائی کا ایک اور جھٹکا! ایل پی جی کے داموں میں پھر اضافہ

نئی دہلی: سال کے آخری مہینے کا آغاز ہو چکا ہے اور عوام کو مہنگائی کا ایک اور جھٹکا لگا ہے۔ آئل مارکیٹنگ کمپنیوں نے ایل پی جی سلنڈر کی قیمتوں میں 41 روپے کا اضافہ کیا ہے، یہ اضافہ 19 کلو کمرشل گیس سلنڈر کی قیمت پر کیا گیا ہے۔ تازہ ترین قیمتوں کے مطابق، راجدھانی دہلی میں ایک سلنڈر کی قیمت بڑھ کر 1796.50 روپے ہو گئی ہے۔

ایل پی جی سلنڈر کی قیمتوں کو آئی او سی ایل کی ویب سائٹ پر اپ ڈیٹ کر دیا گیا ہے اور بدلی ہوئی قیمتیں یکم دسمبر سے نافذ ہو گئی ہیں۔ یاد رہے کہ دیوالی سے عین قبل بھی آئل مارکیٹنگ کمپنیوں نے 19 کلو کے کمرشل گیس سلنڈر کی قیمت میں 103 روپے کا اضافہ کیا تھا اور یکم نومبر 2023 کو دہلی میں اس کی قیمت 1833.00 روپے ہو گئی تھی، لیکن 16 نومبر کو چھٹھ کے تہوار کو اس سے قبل اس پر ریلیف دیا گیا اور سلنڈر کی قیمت 50 روپے کم کر کے 1755.50 روپے کر دی گئی تاہم سال کے آخر تک قیمتوں میں ایک بار پھر 41 روپے کا اضافہ کر دیا گیا۔

راجدھانی دہلی میں آج سے 19 کلو کا ایل پی جی سلنڈر 1755.50 روپے کے بجائے 1796.50 روپے میں دستیاب ہوگا۔ کولکاتا میں اس کی قیمت 1885.50 روپے سے بڑھا کر 1908.00 روپے کر دی گئی ہے۔ ممبئی میں کمرشل ایل پی جی سلنڈر کی قیمت 1728.00 روپے کے بجائے 1749.00 روپے ہو گئی ہے۔ جبکہ چنئی میں یہ 1942.00 روپے کے بجائے 1968.50 روپے میں دستیاب ہوگا۔

غورطلب ہے کہ ایک طرف کمرشل گیس سلنڈر کی قیمتوں میں مسلسل ردوبدل کا سلسلہ جاری ہے تو دوسری جانب آئل مارکیٹنگ کمپنیوں نے 14 کلو گھریلو گیس سلنڈر کی قیمتیں برقرار رکھی ہیں۔ آئی او سی ایل کی ویب سائٹ کے مطابق، یہ دہلی میں 903 روپے، کولکاتا میں 929 روپے، ممبئی میں 902.50 روپے اور چنئی میں 918.50 روپے میں دستیاب ہے۔