بالی ووڈ کے کنگ شاہ رخ خان سے کیوں ناراض ہیں شتروگھن سنہا؟

بالی ووڈ کو کئی سپر ہٹ فلمیں دے چکے گزرے زمانے کے اداکار شتروگھن سنہا ان دنوں بالی ووڈ کے کنگ یعنی شاہ رخ خان سے ناراض چل رہے ہیں۔ اس بات کا انکشاف انھوں نے ایک انٹرویو کے دوران کیا ہے۔ اپنے مشہور ڈائیلاگ ’خاموش‘ سے پہچانے جانے والے شتروگھن سنہا کی شاہ رخ خان سے ناراضگی اس لیے ہے کیونکہ آرین معاملے میں مکمل حمایت کے باوجود شاہ رخ خان نے ’شکریہ‘ کا ایک لفظ بھی نہیں کہا۔ یعنی شاہ رخ خان ’خاموش‘ رہ گئے۔

شتروگھن سنہا کا کہنا ہے کہ جب ڈرگز کیس میں آرین خان کو گرفتار کیا گیا تھا تو انھوں نے شاہ رخ کے بیٹے کی نہ صرف حمایت کی بلکہ ان کا دفاع بھی کیا تھا۔ اس کے بعد شاہ رخ نے ان کا شکریہ ادا کرنے کے لیے ایک فون کال تک کرنا ضروری نہیں سمجھا۔ قابل ذکر ہے کہ آرین خان کو اب نارکوٹکس کنٹرول بیورو نے ڈرگز کیس میں کلین چٹ دے دی ہے۔

اکتوبر 2021 میں جب این سی بی نے آرین خان کو گرفتار کیا تھا تو ان چنندہ لوگوں میں شتروگھن سنہا بھی شامل تھے جنھوں نے اس گرفتاری کی تنقید کی تھی۔ شتروگھن سنہا نے اس وقت کو یاد کرتے ہوئے ’نیشن نیکسٹ‘ کو دیے گئے انٹرویو میں کہا کہ ’’ایک سرپرست کے طور پر میں نے شاہ رخ خان کا درد سمجھا۔ اگر وہ قصوروار بھی ہوتا تب بھی اسے ریہیب میں بھیجے جانے کی جگہ لاک اَپ میں بند کر دیا گیا۔ میں نے تب وہی کہا جو جائز تھا۔ لیکن مجھے شاہ رخ خان نے ایک تھینک یو کارڈ بھی نہیں بھیجا۔ جب کہ میں آرین کو جیل بھیجے جانے کے خلاف ممبئی میں آواز اٹھانے والوں میں سب سے آگے تھا۔‘‘

شتروگھن سنہا نے انٹرویو کے دوران یہ بھی کہا کہ ’’میری ایک عادت ہے، جو جیسا ہے اسے ویسا بتاتا ہوں۔ میں ہمیشہ سچ کے ساتھ کھڑا رہتا ہوں۔ تب بھی میں نے وہی کیا تھا۔ مجھے لگا کہ وہاں ناانصافی ہو رہی ہے اور اس لیے میں نے آواز اٹھائی۔ جہاں تک شاہ رخ خان کا سوال ہے، تو انھوں نے مجھے نہ تو شکریہ کہا اور نہ ہی کوئی تھینک یو کارڈ ہی بھجوایا۔‘‘

جب شتروگھن سنہا سے یہ سوال کیا گیا کہ کیا انھوں نے اپنی طرف سے شاہ رخ خان سے بات کرنے کی کوشش کی؟ اس کے جواب میں انھوں نے کہا کہ ’’نہیں، بالکل بھی نہیں۔ میں کیوں کروں، مجھے ان سے کام بھی نہیں چاہیے۔ مجھے ان سے رابطہ کرنے کی کیا ضرورت ہے۔‘‘ ساتھ ہی شتروگھن سنہا نے یہ وضاحت بھی کی کہ شاہ رخ خان نے کبھی ان سے حمایت کا مطالبہ بھی نہیں کیا تھا۔