نیشنل فلم ایوارڈ: شاہ رخ خان کو ’جوان‘ پر پہلی بار بہترین اداکار کا اعزاز، ’12ویں فیل‘ بہترین فلم قرار

نئی دہلی: وزارت اطلاعات و نشریات کی جانب سے یکم اگست 2025 کو 71ویں نیشنل فلم ایوارڈز کا اعلان کیا گیا، جس میں سال 2023 کی بہترین فلموں اور فلمی کارکردگیوں کو سراہا گیا۔ اس بار بالی ووڈ کے کنگ شاہ رخ خان نے پہلی بار نیشنل ایوارڈ حاصل کیا، جو انہیں فلم جوان میں ان کی شاندار اداکاری پر دیا گیا۔ اس ایکشن تھرلر فلم میں انہوں نے ایک ایسے کردار کو نبھایا جو بدعنوان نظام کے خلاف جدوجہد کرتا ہے۔

انہیں بہترین اداکار کا ایوارڈ وکرانت میسی کے ساتھ مشترکہ طور پر دیا گیا، جنہوں نے 12ویں فیل میں آئی پی ایس افسر منوج کمار کے جدوجہد بھرے سفر کو مؤثر انداز میں پیش کیا۔ اسی فلم کو اس سال کی بہترین فیچر فلم بھی قرار دیا گیا۔

رانی مکھرجی کو فلم مسز چٹرجی ورسز ناروے میں ایک ماں کے جذباتی کردار پر بہترین اداکارہ کا ایوارڈ دیا گیا۔ اس فلم میں وہ ایک ہندوستانی ماں کا کردار ادا کرتی ہیں جسے ناروے کی چائلڈ ویلفیئر ایجنسی سے اپنے بچوں کی تحویل کے لیے قانونی جنگ لڑنی پڑتی ہے۔

بہترین ہدایت کار کا اعزاز سدیپتو سین کو دی کیرالہ اسٹوری کے لیے ملا، جبکہ کرن جوہر کی فلم راکی اور رانی کی پریم کہانی کو 'بہترین تفریحی فلم' کے زمرے میں سراہا گیا۔ سال 2023 کی متنازعہ اور کامیاب فلموں میں شامل اینمل کو تین ایوارڈز ملے، جن میں اسپیشل مینشن برائے ری-ریکارڈنگ، بہترین بیک گراؤنڈ اسکور اور بہترین ساؤنڈ ڈیزائننگ شامل ہیں۔

وکی کوشل کی جنگی فلم سم بہادر کو ’قومی اور سماجی اقدار کو فروغ دینے والی بہترین فلم‘ قرار دیا گیا۔ اس فلم نے بہترین میک اپ اور بہترین کاسٹیوم ڈیزائن کے زمرے میں بھی ایوارڈ جیتے۔

علاقائی سنیما میں، تمل فلم پارکنگ کو بہترین تمل فلم، بہترین اسکرین پلے (رام کمار بالا کرشنن) اور بہترین معاون اداکار (ایم ایس بھاسکر) کے تین ایوارڈز حاصل ہوئے۔

پچھلے سال کنڑا فلم کانتارا کے لیے رشبھ شیٹی کو بہترین اداکار کا ایوارڈ دیا گیا تھا۔ اس سال بہترین اداکارہ کے ایوارڈ میں نیتیا مینن (تروچیترامبلم) اور مانسی پریک (کچھ ایکسپریس) کو مشترکہ طور پر نوازا گیا۔