دھان کی بوائی مکمل، لاک ڈاؤن کے دور میں کھیتی کا مزہ لیتے سلمان خان

بالی ووڈ کے سلطان اور مداحوں کے بھائی سلمان خان ان دنوں ممبئی کے رش سے دور پنویل میں واقع اپنے فارم ہاؤس پر وقت گزار رہے ہیں اور یہاں پر کھیتی کا مزہ لے رہے ہیں۔ سلمان خان نے سوشل میڈیا پر یکے بعد دیگرے کئی ایسی ویڈیوز شیئر کی ہیں جن میں وہ کھیتوں میں کام کرتے ہوئے نظر آ رہے ہیں۔

سلمان خان کا یہ انداز نہ صرف ان کے مداحوں میں کافی پسند کیا جا رہا ہے بلکہ معروف ہستیاں بشمول سیاسی لیڈران بھی ان کی ستائش کر رہے ہیں۔ سلمان خان نے ایک ایسی ویڈیو شیئر کی ہے جس میں وہ ٹریکٹر سے کھیت کی جتائی کرتے ہوئے نظر آ رہے ہیں۔

سلمان خان کسی ویڈیو میں کسانوں کی طرح ٹریکٹر چلا رہے ہیں تو کسی ویڈیو میں پانی سے بھرے کھیت کی مٹی کو ہموار بنانے کے لئے ٹریکٹر کے پیچھے مشین پر کھڑے نظر آ رہے ہیں۔ زبردست بارش کے درمیان شوٹ کی گئی اس ویڈیو کو شیئر کرتے ہوئے سلمان خان نے ’فارمنگ‘ یعنی کھیتی لکھا۔

سلمان خان نے جو اپنی تازہ ویڈیو سوشل میڈیا پر شیئر کی ہے اس میں انہوں نے لکھا ہے، ’چاول (دھان) کی بوائی مکمل‘۔ اس سے قبل سلمان خان نے ایک تصویر شیئر کی تھی جس میں وہ مٹی سے لت پت نظر آ رہے ہیں۔ اس تصویر کو شیئر کرتے ہوئے سلمان خان نے ملک کے کسانوں کے تئیں احترام ظاہر کرتے ہوئے لکھا تھا، ’ریسپکٹ تو آل دی فارمرز‘۔

اس سے پہلے سلمان خان نے ایک ایسی تصویر بھی شیئر کی تھی جس میں وہ کھیت میں پودوں کی روپائی کرتے ہوئے نظر آ رہے ہیں۔ اس تصویر کو شیئر کرتے ہوئے انہوں نے لکھا تھا، ’’دانے دانے پر لکھا ہوتا ہے کھانے والے کا نام...جے جوان، جے کسان۔‘‘

سلمان خان کی کھیتی کرتے ہوئے ویڈیو کی تعریف کرتے ہوئے کانگریس رہنما سنجے نروپم نے لکھا، ’’سلمان خان نے بھلے ہی یہ ویڈیو مزے کے لئے بنائی ہو لیکن اس سے ملک کے نوجوانوں میں کھیتی کے تئیں نیا حوصلہ ضرور پیدا ہوگا۔‘‘