عائشہ ٹاکیہ: کامیاب فلمی سفر کے بعد شادی، اسلام قبول کر کے نئی زندگی کا آغاز

معصوم مسکراہٹ اور دلکش انداز کی مالک اداکارہ عائشہ ٹاکیہ نے کم وقت میں بالی ووڈ میں اپنی نمایاں جگہ بنائی، مگر کامیابی کے باوجود انہوں نے شادی کے بعد فلمی دنیا سے کنارہ کشی اختیار کر کے ایک نئی زندگی کا انتخاب کیا۔ وہ 10 اپریل کو اپنی 40ویں سالگرہ منا رہی ہیں۔

ممبئی میں پیدا ہونے والی عائشہ ٹاکیہ کو بچپن ہی سے اداکاری کا شوق تھا۔ انہوں نے کم عمری میں ہی اس خواب کا اظہار کیا اور صرف پندرہ برس کی عمر میں اپنے پہلے میوزک ویڈیو میں نظر آئیں۔ فالگنی پاٹھک کے مقبول گانے ’میری چنر اڑ اڑ جائے‘ نے انہیں گھر گھر پہچان دلائی اور یہی ان کے کیریئر کا پہلا اہم سنگِ میل ثابت ہوا۔

سال 2004 میں عائشہ کے لیے فلمی دنیا کے دروازے کھلے۔ ابتدا میں انہیں ابھے دیول کے ساتھ فلم ’سوچا نہ تھا‘ میں موقع ملا، تاہم اس کی ریلیز میں تاخیر ہوئی۔ اسی دوران ریلیز ہونے والی فلم ’ٹارزن: دی ونڈر کار‘ نے انہیں راتوں رات شہرت دلائی۔ اس فلم میں ان کی اداکاری کو سراہا گیا اور انہیں بہترین نووارد اداکارہ کا فلم فیئر ایوارڈ بھی ملا۔

اس کے بعد انہوں نے ’دل مانگے مور‘، ’شادی نمبر 1‘، ’سلامِ عشق‘ اور ’پاٹھشالہ‘ جیسی فلموں میں کام کیا۔ اگرچہ ان میں سے کئی فلمیں باکس آفس پر کامیاب نہ ہو سکیں، لیکن سلمان خان کے ساتھ ان کی فلم ’وانٹڈ‘ سپر ہٹ رہی اور آج بھی ان کے کیریئر کی اہم فلموں میں شمار ہوتی ہے۔

ان کی آخری فلم ’موڑ‘ تھی، جس میں انہوں نے ایک سنجیدہ کردار ادا کیا اور ناقدین کی تعریف حاصل کی، اگرچہ فلم تجارتی طور پر کامیاب نہ ہو سکی۔ اس کے بعد عائشہ ٹاکیہ نے اپنے قریبی ساتھی فرحان اعظمی سے شادی کی اور اسلام قبول کر کے اپنی زندگی کا رخ بدل لیا۔

شادی کے بعد انہوں نے فلمی دنیا سے مکمل دوری اختیار کر لی اور واضح کیا کہ وہ اب اپنی نجی زندگی، خاندان اور سماجی سرگرمیوں پر توجہ دینا چاہتی ہیں۔ عائشہ ٹاکیہ آج بھی اپنے مداحوں کے دلوں میں زندہ ہیں اور ان کی فلمیں بدستور ناظرین میں مقبول ہیں۔