منی پور کی فلم ’بونگ‘ کو بافٹا ایوارڈ، فرحان اختر کی پروڈکشن کی عالمی سطح پر پذیرائی

ہندوستانی منی پوری زبان کی کامیڈی ڈرامہ فیچر فلم ’بونگ‘ کو بافٹا ایوارڈ میں بہترین بچوں اور فیملی فلم کے ایوارڈ سے نوازا گیا، جو کہ سب سے باوقار ایوارڈز میں سے ایک ہے۔ خاص بات یہ ہے کہ فلم ’بونگ‘ فرحان اختر کے ایکسل انٹرٹینمنٹ کے بینر تلے بنی ہے اور فلم کی ہدایت کاری لکشمی پریا دیوی نے کی ہے۔ بونگ رواں سال کی پہلی ہندوستانی فلم ہے جسے ’بافٹا‘ میں نامزد کیا گیا تھا اور اب فلم کو بہترین بچوں اور فیملی فلم کے ایوارڈ سے نوازا گیا ہے۔

واضح رہے کہ بافٹا جیسے بڑے اسٹیج پر ہندوستان کی علاقائی فیچر فلموں کو اعزاز ملنا فخر کی بات ہے۔ فلم کی ہدایت کار لکشمی پریا دیوی اسٹیج پر ایوارڈ لینے پہنچیں اور ان کے ساتھ فرحان اختر بھی نظر آئے۔ جذباتی لکشمی پریا دیوی نے اسٹیج سے بافٹا کا شکریہ ادا کیا اور ان کی چھوٹی سی فلم کو اتنا بڑا اعزاز اور پیار دینے کے لیے دل سے شکریہ ادا کیا۔ انہوں نے کہا کہ ’’یہاں تک چلنا ایسا محسوس ہو رہا تھا گویا کسی پہاڑ کی چوٹی پر پہنچنے کے لیے آخری چند قدم باقی ہوں، جس پر چڑھنے کے بارے میں ہمیں کبھی علم ہی نہیں تھا۔‘‘ ہدایت کار نے عالمی پلیٹ فارم پر منی پور کی صورتحال کے بارے میں بات کی۔

اپنی تقریر میں ہدایت کار نے کہا کہ ’’یہ فلم اور یہ جیت میری آبائی ریاست منی پور کے لیے ایک خراج عقیدت ہے، جے ہندوستان میں نظر انداز اور نمائندگی سے محروم سمجھا جاتا ہے۔ یہ فلم ہندوستان کے ایک انتہائی پریشان، نظر اندز کیے گئے اور کم نمائندگی والے خطے، میرے آبائی شہر منی پور کے پس منظر پر بنی ہے۔ میں اس موقع پر منی پور میں امن کی واپسی کے لیے دعا کرنا چاہتی ہوں۔‘‘

قابل ذکر ہے کہ فیچر فلم ’بونگ‘ منی پور کی سرحد پر نسلی تناؤ اور زندگی کی مشکلات سے نبرد آزما ایک اسکولی بچے کی کہانی ہے، جس نے پیدائش سے ہی تشدد اور محرومی کو محسوس کیا ہے۔ اس کے ساتھ ہی فلم ریاست میں جاری سماجی اور سیاسی تناؤ کے پس منظر کو بھی باریک بینی سے دکھاتی ہے۔ کہانی میں ایک اسکولی بچہ اپنے بکھرے ہوئے خاندان کو متحد کرنے اور اپنے بچھڑے ہوئے والد کو واپس لانے کی جدوجہد کر رہا ہے۔

’بافٹا‘ سے قبل فلم ’بونگ‘ کا ورلڈ پریمیئر 2024 میں ٹورنٹو انٹرنیشنل فلم فیسٹیول کے ڈسکوری سیکشن میں ہوا تھا۔ اس کے علاوہ فلم وارسا انٹرنیشنل فلم فیسٹیول 2024، ہندوستان کے 55ویں انٹرنیشنل فلم فیسٹیول اور انڈین فلم فیسٹیول آف میلبورن 2025 میں بھی نمائش کے لیے پیش کی جا چکی ہے۔