غزہ: اسرائیلی فوج کا زیتون محلے سے انخلاء کا حکم

شدید عسکری کارروائی کے دوران اسرائیلی فوج نے جمعہ کی صبح غزہ شہر کے جنوب مشرقی علاقے زیتون کے رہائشیوں کو فوری طور پر گھروں سے نکلنے کا حکم دیا، جبکہ گھروں کی تباہی اور فضائی حملے مسلسل جاری ہیں۔

اسرائیلی فوج کی بمباری اور توپ خانے کی فائرنگ کے نتیجے میں غزہ کی مختلف جگہوں پر کئی شہری جاں بحق اور زخمی ہوئے۔ العربیہ اور الحدث کے نامہ نگار کے مطابق رفح کے مغربی حصے میں ایک فضائی حملے میں تین عام شہری ہلاک ہوئے۔

زیتون محلے میں اسرائیلی فوج نے کئی رہائشی عمارتوں کو دھماکوں سے اڑا دیا، جبکہ اسی دوران جنگی طیاروں نے جنوبی شہر خان یونس پر متعدد فضائی حملے کیے۔ فلسطینی وزارت صحت کے مطابق اسرائیلی جنگ کے آغاز سے اب تک شہداء کی تعداد 61 ہزار 776 تک پہنچ گئی ہے، جبکہ 1 لاکھ 54 ہزار 906 افراد زخمی ہو چکے ہیں۔

یہ پیش رفت ایسے وقت میں ہوئی ہے جب اسرائیلی فوج مرحلہ وار غزہ شہر پر مکمل قبضے کی منصوبہ بندی کر رہی ہے، جو کئی ہفتوں تک جاری رہ سکتی ہے۔دریں اثنا عالمی اور اقوام متحدہ کی سطح پر جنگ کے پھیلاؤ کے خطرات پر شدید تشویش اور مذمت کی جا رہی ہے۔ محاصرے میں گھرے غزہ میں انسانی صورتحال بدترین ہو چکی ہے، غذائی اور طبی امداد نہ ہونے کے برابر ہے اور محفوظ مقامات کا فقدان ایک بڑے المیے کا پیش خیمہ بن رہا ہے۔ (بشکریہ نیوز پورٹل العربیہ ڈاٹ نیٹ، اردو)