ہندوستان اور سعودی عرب کے درمیان حج 2027 کا معاہدہ، 1.75 لاکھ عازمین کا کوٹہ طے

ریاض: ہندوستان اور سعودی عرب کے درمیان حج 2027 کے لیے دوطرفہ معاہدے پر دستخط ہو گئے ہیں۔ اس معاہدے کے تحت آئندہ سال ہندوستان سے مجموعی طور پر 1 لاکھ 75 ہزار 25 عازمین حج کی سعادت حاصل کر سکیں گے۔ مرکزی وزیر برائے اقلیتی امور کرن رجیجو اور سعودی عرب کے وزیر برائے حج و عمرہ ڈاکٹر توفیق بن فوزان الربیعہ نے جدہ میں ملاقات کے دوران معاہدے پر دستخط کیے۔ اس موقع پر دونوں ممالک کے حکام نے حج 2027 کی تیاریوں اور انتظامات کا بھی جائزہ لیا۔

جدہ میں واقع ہندوستانی قونصل خانے نے سوشل میڈیا پلیٹ فارم ایکس پر اس معاہدے کی اطلاع دیتے ہوئے کہا کہ حج 2027 کے لیے ہندوستان اور سعودی عرب کے درمیان تعاون کو مزید مضبوط بنایا گیا ہے۔ معاہدے کے تحت ہندوستان کے لیے 1,75,025 عازمین کا کوٹہ یقینی بنایا گیا ہے۔

قونصل خانے کے مطابق دونوں وزرا کے درمیان ہونے والی ملاقات میں حج سفر سے متعلق مختلف انتظامات، انتظامی ترجیحات اور ہندوستانی عازمین کے لیے محفوظ، آسان اور بہتر سفر کو یقینی بنانے کے اقدامات پر تبادلہ خیال کیا گیا۔ دونوں فریقوں نے اس بات پر زور دیا کہ حج کے دوران عازمین کو بہتر سہولیات فراہم کرنے کے لیے باہمی تال میل اور تعاون کو مزید مضبوط بنایا جائے۔

مرکزی وزیر کرن رجیجو جمعہ کو جدہ پہنچے تھے۔ ان کے دورے کا مقصد چھٹی حج کانفرنس اور نمائش 2027 میں شرکت کرنا، سعودی عرب کے ساتھ حج معاہدے پر دستخط کرنا اور آئندہ سال ہندوستانی عازمین حج کے لیے انتظامات کا جائزہ لینا تھا۔ اپنے دورے کے دوران رجیجو نے حج عازمین کی فلاح و بہبود کے لیے سعودی عرب کی مسلسل کوششوں اور عزم کی ستائش کی۔ انہوں نے ہندوستان اور سعودی عرب کے درمیان مضبوط تعلقات کا حوالہ دیتے ہوئے حج 2027 کو کامیاب بنانے کے لیے دونوں ممالک کے مشترکہ عزم کا بھی اظہار کیا۔

کرن رجیجو نے ایکس پر اپنی ایک پوسٹ میں بتایا کہ انہوں نے ہندوستانی قونصل جنرل فہد سوری اور جوائنٹ سکریٹری (حج) محمد افضل کے ساتھ جدہ میں منعقدہ چھٹی حج کانفرنس اور نمائش 2027 کی افتتاحی تقریب میں شرکت کی۔ انہوں نے کہا کہ حج عازمین کی فلاح و بہبود اور حج 2027 کے کامیاب انعقاد کے لیے ہندوستان اور سعودی عرب کی شراکت داری کو مزید مضبوط بنایا جا رہا ہے۔

اس سے قبل ہفتے کے روز سعودی وزیر حج و عمرہ ڈاکٹر توفیق بن فوزان الربیعہ کی جانب سے منعقدہ سرکاری عشائیے میں بھی کرن رجیجو نے شرکت کی۔ اس موقع پر انہوں نے پرتپاک استقبال اور مختلف اہم شخصیات سے ملاقات کا موقع فراہم کرنے پر سعودی حکام کا شکریہ ادا کیا۔ انہوں نے کہا کہ دونوں ممالک نے حج عازمین کی بہتر خدمت اور ان کے حج کے تجربے کو مزید خوش گوار بنانے کے اپنے مشترکہ عزم کا اعادہ کیا ہے۔

جدہ کے دورے کے دوران کرن رجیجو نے ہندوستانی تارکین وطن اور سعودی عرب کی معزز شخصیات کے ساتھ دیوالی بھی منائی۔ اس سلسلے میں ایک تقریب ہندوستانی قونصل جنرل فہد سوری کی رہائش گاہ پر منعقد ہوئی۔ تقریب سے خطاب کرتے ہوئے رجیجو نے کہا کہ جدہ واپس آکر انہیں خوشی ہو رہی ہے اور یہاں ان کا تیسرا دورہ بھی یادگار اور بامقصد رہا ہے۔