کورونا وائرس انفیکشن سے ہندوستان میں سبھی پریشان ہو چکے ہیں۔ اس درمیان ذرائع ابلاغ نے تبلیغی جماعت کے معاملہ کو بھی خوب اچھالا۔ جگہ جگہ سے ان مسلمانوں کو پکڑ کر کوارنٹائن سنٹر میں ڈالا گیا جن کے بارے میں شبہ تھا کہ وہ تبلیغی جماعت کے اجلاس میں شامل ہوئے یا پھر جماعت سے تعلق رکھتے ہیں۔ دہلی پولس نے یکم اپریل کو شمال مشرقی علاقہ سے 20 مسلمانوں کو تبلیغی جماعت جلسہ میں شامل ہونے کے اندیشہ میں کوارنٹائن سنٹر بھیج دیا۔ ان سبھی کا کورونا ٹیسٹ کرایا گیا اور سبھی کا ریزلٹ نگیٹو آیا۔ دلچسپ بات یہ ہے کہ ان میں سے کوئی بھی اجلاس میں شامل نہیں ہوا تھا اور نہ ہی کوارنٹائن میں بھیجے گئے یہ لوگ اجلاس میں شامل کسی دیگر شخص کے بارے میں واقفیت رکھتے تھے۔
قابل ذکر ہے کہ جن مسلم نوجوانوں کو وزیر آباد دہلی پولس ٹریننگ اکیڈمی میں واقع کووڈ-19 کوارنٹائن سنٹر میں رکھا گیا ہے، ان میں سے کم از کم 20 لوگوں کا دو بار کورونا ٹیسٹ ہوا اور وہ نگیٹو پائے گئے۔ ان میں سے تقریباً 8 افراد شاستری پارک میں رہتے ہیں جب کہ بقیہ کا تعلق کھجوری خاص سے ہے۔
Published: undefined
اترپردیش کے ضلع بلند شہر کے انوپ شہر علاقے میں مندر میں سو رہے دو سادھوؤں کا گلا کاٹ کر قتل کردیا گیا۔ سینئر سپرنٹنڈنٹ آف پولیس سنتوش کمار سنگھ نے منگل کو بتایا کہ انوپ شہر، شکارپور شاہراہ پر واقع پگونا گاؤں میں شیو مندر ہے۔ گزشتہ دس سالوں سے علی گڑھ کے 55 سالہ بابا غریب داس عرف جگن داس اور ان کا 35 سالہ شاگرد شیر سنگھ عرف سیوا داس مندر کی دیکھ بھال کرتے تھے۔ پیر کی رات میں دونوں مندر احاطے کے کمرے میں سو رہے تھے۔ صبح جب مقامی افراد پوجا کے لئے مندر گئے تو دونوں کی لاشیں خون میں لت پت پڑی ہوئی دیکھ کر پولیس کو مطلع کیا۔ اطلاع ملنے پر ایس ایس پی سنتوش کمار سنگھ پولیس ٹیم و فورنسک ٹیم کے ساتھ گاؤں پہنچے۔ پولیس نے قتل کے الزام میں ایک شخص مراری کو نشے کی حالت میں گرفتار کیا ہے۔ قتل کی اس واردات سے علاقے میں کافی اشتعال ہے۔ ایس ایس پی نے بتایا کہ دو دن قبل مراری نے سادھو جگدیش داس کا چمٹا غائب کردیا تھا جس لے کر بابا نے اسے برا بھلا کہا تھا اور پھٹکار بھی لگائی تھی۔ انہوں نے بتایا کہ ملزم نشے کا عادی ہے۔
Published: undefined
کانگریس کی جنرل سکریٹری پرینکا گاندھی واڈرا نے اتر پردیش میں 15 دنوں میں 100 لوگوں کے قتل پر گہری تشویش کا اظہار کرتے ہوئے ان واقعات کی مکمل تحقیقات کرانے کا مطالبہ کیا ہے۔ پرینکا گاندھی نے کہا ہے کہ گزشتہ تین دن میں ریاست میں دو مہاتماؤں سمیت پانچ افراد کا قتل ہوا ہے۔ یہ سارے واقعات سنگین تشویش کے باعث ہیں اور ان کی غیر جانبدارانہ جانچ کی ضرورت ہے۔ پرینکا گاندھی نے نے ٹوئٹ کیا ”اپریل کے پہلے 15 دنوں میں ہی اتر پردیش میں سو افراد کا قتل ہوگیا۔ تین دن پہلے ایٹہ میں پچوری خاندان کے پانچ افراد کی لاشیں مشتبہ حالات میں پائی گئیں۔ کوئی نہیں جانتا ان کے ساتھ کیا ہوا“۔
Published: undefined
کچھ روز پہلے تک جو بی جے پی کورونا کے پھیلاؤ کو لے کر تبلیغی جماعت کو برا بھلا کہہ رہی تھی اسی بی جے پی کے ترجمان ظفر اسلام اب تبلیغی جماعت کی تعریف کرتے نظر آ رہے ہیں۔ طفر اسلام نے کہا ہے کہ تبلیغی جماعت کے صحتیاب ہو چکے کورونا متاثرین کی طرف سے کورونا کے دیگر متاثرین کو اس وبا کی زد سے باہر نکالنے کے لئے اپنی مرضی سے اپنا پلازمہ دینے کا فیصلہ عین اسلامی تعلیم کی ترجمانی کرتا ہے۔ انہوں نے کہا کہ کورونا کی زد میں آنا مکمل طور پر کسی کے ہاتھ میں نہیں ہے لیکن اپنا خون پلازمہ عطیہ کرنا مکمل طور پر متاثرین کا اپنا فیصلہ ہے۔ انہوں نے کہا کہ تبلیغی جماعت والوں کے اس قابل ستائش اقدام کو تسلیم کرنا چاہیے، جنہوں نے اپنی مرضی سے اپنا پلازمہ عطیہ کیا۔ اس سے دوسروں کو بھی ایسا کرنے کی ترغیب ملے گی۔
Published: undefined
پوری دنیا میں کورونا متاثرین کی تعداد جہاں ساڑے 30 لاکھ سے زیادہ ہو گئی ہے وہیں کورونا سے ہلاک ہونے والوں کی تعداد دو لاکھ 11 ہزار سے تجاوز کر گئی ہے۔ امریکہ میں کورونا وائرس سے ہلاک ہونے والوں کی تعداد 56 ہزار سے تجاوز کر گئی ہے اور وہاں اس وبا سے متاثر ہونے والوں کی تعداد 10لاکھ سے اوپر پہنچ گئی ہے۔ اٹلی میں اموات کی تعداد 26 ہزار سے زیادہ ہے جبکہ اسپین میں 23 ہزار، فرانس میں 23 ہزار اور برطانیہ میں ساڑے 21 ہزار سے زیادہ ہے۔ سعودی عرب میں متاثرین کی تعداد ساڑے 18 ہزار سے زیادہ ہو گئی ہے اور وہاں ہلاک ہونے والوں کی تعداد 144 بتائی جا رہی ہے۔
Published: undefined
'قومی آواز' کے قارئین کے لیے اس پاکیزہ مہینے میں روزہ و افطار کے تعلق سے ہم روزانہ کچھ حدیث و روایت پیش کر رہے ہیں تاکہ قارئین اس کی اہمیت و افادیت سے روشناس ہو سکیں۔ پیش خدمت ہے اس سلسلہ کی چوتھی قسط...
حضرت زید بن خالد جہنیؓ سے روایت ہے کہ رسول اکرم صلی اللہ علیہ وسلم نے ارشاد فرمایا: جو شخص کسی روزے دار کو افطار کرائے تو روزے دار کے ثواب میں سے کچھ کمی کیے بغیر افطار کرانے والے کو اتنا ہی اجر وثواب ملے گا، جتنا روزے دار کو ملے گا۔ (ترمذی،ابن ماجہ)
اس حدیث میں غور کرنے والی بات یہ ہے کہ مطلقاً کسی بھی شخص کو افطار کرانے کی بات کہی گئی ہے، اس کے لئے غرباء ومساکین کی تخصیص نہیں ہے۔
Published: undefined
قومی آواز کے قارئین سے ضروری گزارش، لاک ڈاؤن کے ضابطوں کی پابندی کریں۔ شکریہ
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: undefined