موہالی کا بین الاقوامی ہاکی اسٹیڈیم اولمپین بلبیر سنگھ سینئر کے نام سے منسوب

چنڈی گڑھ: معروف ہاکی کھلاڑی اوراولمپین بلبیر سنگھ سنیئر کی پہلی برسی کے موقع پر موہالی کا ہاکی اسٹیڈیم ان کے نام سے منسوب کیا گیا ہے۔ اسٹیڈیم میں صبح انہیں خراج عقیدت پیش کی گئی۔ کھیل، نوجوانوں کے امورکے وزیر رانا گرمیت سنگھ سوڑھی نے موہالی کے بین الاقوامی ہاکی اسٹیڈیم کا نام پدم شری بلبیرسنگھ سینئر کے نام پر رکھنے کی کل منظوری دے دی تھی اور ان کی جانب سے ہاکی اسٹیڈیم کو عظیم کھلاڑی کو وقف کیا گیا۔ اب اسٹیڈیم کو ’اولمپین بلبیرسنگھ سینئر انٹرنیشنل ہاکی اسٹیڈیم‘ کے طور پر جانا جائے گا۔

رانا سوڑھی نے کہا کہ کووڈ کے حالات میں بہتری ہونے پر اس اسٹیڈیم میں عظیم بین الاقوامی کھلاڑی کی یاد میں ایک بین الاقوامی ہاکی ٹورنامنٹ کا انعقاد کیا جائے گا۔ وزیر کھیل نے بتایا کہ اسپورٹ ڈیپارٹمنٹ ریاست کے باصلاحیت کھلاڑیوں کے لئے بلبیر سنگھ سینئر کے نام پر اسکالرشپ شروع کرے گا اوران کی یاد میں اسٹیڈیم کے داخلی دروازے پر ایک مجسمہ بھی نصب کیا جائے گا۔ وزیرموصوف نے عظیم کھلاڑی کی یاد میں شجرکاری بھی کی۔

یادرہے کہ بلبیرسنگھ سینئر نے تین بار اولمپک چیمپئن بننے کے لئے ہندوستانی ہاکی ٹیم میں اہم کردار ادا کیا اور آج تک کوئی بھی ان کا اولمپک فائنل کا ریکارڈ نہیں توڑ سکا۔ انہوں نے 1952 کے اولمپک کھیل کے فائنل میں پانچ گول کیے جس میں ہندوستان نے نیدرلینڈ پر 1-6 سے جیت درج کی۔

بلبیر سنگھ سینئر سال 1975 کی عالمی کپ فاتح ہندوستانی ٹیم کے منیجر تھے۔ انہوں نے اسپورٹ ڈیپارٹمنٹ، پنجاب کے ڈائریکٹر کے طورپر خدمات انجام دیں اورنوجوانوں کو کھیل کی دنیا کی طرف راغب کیا۔ حکومت پنجاب نے اس عظیم کھلاڑی کو سال 2019 میں مہاراجہ رنجیت سنگھ ایوارڈ سے نوازا تھا۔ اس موقع پر چاراولمپین کھلاڑی رجندرسنگھ سینئر، رجندرسنگھ جونیئر، اجیت سنگھ اور پربھجوت سنگھ و سکریٹری، کھیل راج کمل چودھری، ڈائریکٹر ڈی پی ایس کھربندا موجود تھے۔