ایشین پیرا گیمز: تیر اندازی میں شیتل-تومن کی جوڑی نے گولڈ پر لگایا نشانہ، ڈسکس تھرو میں سوورنا نے جیتا طلائی تمغہ

ایشین پیرا گیمز میں جمعرات کو ہندوستانی کھلاڑیوں نے شاندار مظاہرہ کرتے ہوئے اب تک 2 طلائی تمغے اپنے نام کر لیے۔ تیر اندازی میں شیتل دیوی اور تومن کمار کی جوڑی نے کمپاؤنڈ مکسڈ ٹیم ایونٹ میں طلائی تمغہ جیتا، جبکہ سوورنا راج نے خواتین کے ایف 54 ڈسکس تھرو مقابلے میں طلائی تمغہ پر قبضہ جمایا۔ دوسری طرف سواتی چودھری نے تیر اندازی کے ڈبلیو 1 زمرے میں ہندوستان کو پہلا تمغہ دلا کر تاریخ رقم کی۔ حالانکہ فائنل میں شکست کے باعث انہیں چاندی کے تمغے پر اکتفا کرنا پڑا۔

شیتل اور تومان کی جوڑی نے دلایا طلائی تمغہ

ہندوستان کی سرفہرست جوڑی شیتل دیوی اور تومن کمار نے کمپاؤنڈ مکسڈ ٹیم فائنل میں انڈونیشیا کی جوڑی کو 151-148 سے شکست دے کر طلائی تمغہ جیتا۔ ہندوستانی جوڑی نے کوالیفکیشن راؤنڈ میں عالمی ریکارڈ بھی قائم کیا تھا۔ فائنل میں ہندوستانی تیر اندازوں نے ابتدا ہی سے شاندار نشانے لگائے۔ پہلے اینڈ میں ہندوستان نے 38-37 کی معمولی برتری حاصل کی۔ دوسرے اینڈ کے بعد ہندوستانی جوڑی نے اپنی برتری کو 77-73 تک پہنچا دیا۔ اس کے بعد بھی ہندوستانی کھلاڑیوں نے اپنا دبدبہ برقرار رکھا اور 3 پوائنٹس کے فرق سے مقابلہ جیت لیا۔ بغیر ہاتھوں کے پیدا ہونے والی شیتل دیوی اپنے پیروں سے کمپاؤنڈ بو کو سنبھالتی ہیں اور کندھے و جبڑے کی مدد سے کمان کی ڈوری کھینچ کر تیر چلاتی ہیں۔

سوورنا راج نے ڈسکس تھرو میں جیتا سونا

ہندوستان کی سوورنا راج نے خواتین کے ایف 54 ڈسکس تھرو مقابلے میں 15.66 میٹر کی اپنی بہترین تھرو کے ساتھ طلائی تمغہ جیتا۔ گریٹر نوئیڈا کی رہنے والی 44 سالہ سوورنا نے اپنی 6 کوششوں میں سے 4 مرتبہ ڈسکس کو 15 میٹر سے آگے پھینکا۔ انہوں نے پانچویں کوشش میں 15.66 میٹر کا فاصلہ طے کر کے پہلی پوزیشن یقینی بنائی۔ ایران کی شہلا حدیدی نے 15.45 میٹر کی تھرو کے ساتھ چاندی، جبکہ ویتنام کی تھی نگوک تھوئی گوین نے 14.65 میٹر کی تھرو کے ساتھ کانسے کا تمغہ جیتا۔

قابل ذکر ہے کہ ایف 54 زمرہ ان کھلاڑیوں کے لیے ہے جن کے جسم اور نچلے اعضا کی فعالیت متاثر ہوتی ہے۔ اس زمرے میں کھلاڑی تھروئنگ چیئر پر بیٹھ کر مقابلہ کرتے ہیں اور بنیادی طور پر جسم کے بالائی حصے کی طاقت اور ہاتھوں کی حرکت کی مدد سے تھرو کرتے ہیں۔ جسم پر قابو پانے کی محدود صلاحیت بھی ان کے تھرو کرنے کے طریقے کو متاثر کرتی ہے۔

سواتی چودھری نے تاریخ رقم کی، چاندی کا تمغہ جیتا

ہندوستانی تیر انداز سواتی چودھری نے خواتین کے انفرادی ڈبلیو 1 زمرے میں چاندی کا تمغہ جیت کر تاریخ رقم کی۔ وہ ایشین پیرا گیمز کے تیر اندازی مقابلے میں اس زمرے میں ہندوستان کے لیے پہلا تمغہ جیتنے والی کھلاڑی بن گئیں۔ حالانکہ فائنل میں انہیں چین کی سین مینگ کان کے خلاف 4-6 سے شکست کا سامنا کرنا پڑا۔ سرفہرست کھلاڑی سواتی نے مقابلے میں 4-2 کی برتری حاصل کر لی تھی، لیکن چینی تیر انداز نے شاندار واپسی کرتے ہوئے مسلسل بہتر کارکردگی کا مظاہرہ کیا اور طلائی تمغہ اپنے نام کر لیا۔

میرٹھ کی گروکل آرچری اکیڈمی میں ایتھنز اولمپکس میں حصہ لے چکے ستیہ دیو پرساد سے تربیت حاصل کرنے والی سواتی نے فائنل میں سخت مقابلہ کیا۔ لیکن آخری 2 اینڈ میں چین کی کھلاڑی نے بازی پلٹ دی۔ اس طرح سواتی کو چاندی کے تمغے پر اکتفا کرنا پڑا۔ تاہم ان کی تاریخی کارکردگی ہندوستانی پیرا تیر اندازی کے لیے ایک بڑی کامیابی بن گئی۔ ڈبلیو 1 زمرہ ان تیر اندازوں کے لیے ہے جن کے ہاتھوں اور پیروں، دونوں میں شدید جسمانی معذوری ہوتی ہے۔ اس زمرے کے کھلاڑی وہیل چیئر پر بیٹھ کر تیر اندازی کرتے ہیں۔