ٹریفک سگنل کی خلاف ورزی سڑک پر، گرفتاری جھاڑیوں کے پیچھے سے

نارتھ رائن ویسٹ فیلیا جرمنی کا سب سے زیادہ آبادی والا صوبہ ہے اور یہ واقعہ اسی صوبے کے شہر رَیکلِنگ ہاؤزن میں جمعرات بائیس ستمبر کی صبح پیش آیا۔ پولیس اہلکار حسب معمول اس شہر کے ایک چوراہے پر ٹریفک کے سرخ سگنل پر نہ رکنے والے ڈرائیوروں کو پکڑنے کے لیے کچھ ہی دور اپنی گاڑی میں تاک لگائے بیٹھے تھے۔

اسی دوران ایک ڈرائیور نے اس چوک میں ٹریفک کی ریڈ لائٹ کی خلاف ورزی کی، تو پولیس اہلکار اس کو پکڑنے کے لیے اس کے پیچھے نکل پڑے۔ ڈرائیور کو اندازہ ہوا کہ اس کا پیچھا کیا جا رہا ہے، تو اس نے اپنی گاڑی کی رفتار اور بڑھا دی اور کافی دور تک پولیس کے ہاتھ آ جانے سے بچا رہا۔

اس دوران پولیس نے اپنی گاڑی پر نصب نیلی لائٹیں بھی روشن کر دیں اور سائرن بھی بجانا شروع کر دیا، مگر پولیس سے بچنے کی کوشش میں 29 سالہ ڈرائیور بہت تیز رفتاری سے گاڑی چلاتا رہا۔

کافی حد تک فلمی نوعیت کا نظر آنے والے اس منظر کے دوران دو راہ گیر بھی فرار کی کوشش کرنے والے اس ڈرائیور کی گاڑی کی زد میں آتے آتے رہ گئے۔

ملزم کی بدقسمتی اس وقت شروع ہوئی جب وہ سڑک، جس پر وہ گاڑی دوڑا رہا تھا، بہت دور جا کر ختم ہو گئی اور آگے دیہی علاقے کا ایک کچا رستہ تھا یا بہت سے کھیت۔ ملزم نے اپنی گاڑی اسی راستے پر روکی اور جا کر ایک کھیت کے کنارے جھاڑیوں کے پیچھے چھپ گیا۔

چند ہی لمحے بعد پولیس موقع پر پہنچی تو کچے راستے پر کھڑی گاڑی دیکھ کر جھاڑیوں کے پیچھے چھپے ملزم کو گرفتار کر لینا کوئی مسئلہ نہ بنا۔ پولیس اہلکاروں کو حیرانی البتہ اس بات پر ہوئی کہ ملزم کے پاس کوئی ڈرائیونگ لائسنس بھی نہیں تھا۔

اب ملزم اور اس کی گاڑی دونوں پولیس کے قبضے میں ہیں اور ملزم کے خلاف مقدمہ بھی درج کر لیا گیا ہے۔