مولانا حکیم عبداللہ مغیثی کا انتقال، جمعیۃ علماء ہند کا اظہارِ تعزیت

نئی دہلی: جمعیۃ علماء ہند کے صدر مولانا محمود اسعد مدنی نے آل انڈیا ملی کونسل کے صدر اور جامعہ عربیہ گلزار حسینیہ اجراڑہ کے مہتمم حضرت مولانا حکیم عبداللہ مغیثی کے انتقالِ پُرملال پر گہرے رنج و الم کا اظہار کیا ہے۔ اپنے تعزیتی بیان میں انہوں نے مرحوم کی دینی، ملی اور سماجی خدمات کو خراجِ عقیدت پیش کرتے ہوئے کہا کہ ان کی زندگی دینِ متین کی خدمت، ملت کی رہ نمائی اور معاشرتی اصلاح کے لیے وقف رہی۔

مولانا محمود اسعد مدنی نے کہا کہ مولانا حکیم عبداللہ مغیثی کو ملک کے اکابر علماء سے گہرا تعلق اور خصوصی نسبت حاصل تھی۔ بالخصوص حضرت مولانا سید ابوالحسن علی حسنی ندویؒ کے حلقۂ ارادت میں ان کا شمار ہوتا تھا، جبکہ جانشینِ شیخ الاسلام حضرت مولانا سید اسعد مدنیؒ سے ان کا روحانی، علمی اور تنظیمی تعلق نہایت مضبوط تھا۔ اس رفاقت نے ان کی شخصیت کو فکری پختگی اور اعتدال عطا کیا، جس کا اثر ان کی خدمات میں نمایاں طور پر دیکھا گیا۔

انہوں نے مزید کہا کہ مولانا مغیثی حضرت علامہ مولانا فخر الدین مرادابادیؒ کے شاگرد تھے اور زمانۂ طالب علمی سے ہی جمعیۃ علماء ہند کی تحریکوں سے وابستہ رہے۔ بعد ازاں انہوں نے جمعیۃ علماء میرٹھ کے صدر کی حیثیت سے طویل عرصے تک خدمات انجام دیں اور دینی و ملی بیداری کے فروغ میں اہم کردار ادا کیا۔ پھر آل انڈیا ملی کونسل سے وابستگی کے بعد انہوں نے اپنی بالغ نظری اور تجربے کی بنیاد پر ملت کی رہنمائی کا فریضہ بخوبی انجام دیا۔

مرحوم نے اپنے آبائی وطن گھگرولی سہارن پور اور اجراڑہ میرٹھ میں دینی، تعلیمی اور اصلاحی سرگرمیوں کو اپنی زندگی کا نصب العین بنائے رکھا۔ وہ آخری سانس تک اسی مشن سے جڑے رہے اور اپنی خدمات کے ذریعے ایک مضبوط علمی و سماجی وراثت چھوڑ گئے۔

مولانا محمود مدنی نے دعا کی کہ اللہ رب العزت مرحوم کی کامل مغفرت فرمائے، ان کے درجات بلند کرے اور ان کی خدمات کو شرفِ قبولیت عطا فرمائے۔ انہوں نے مرحوم کے پسماندگان، متعلقین، تلامذہ اور عقیدت مندوں کے لیے صبرِ جمیل کی بھی دعا کی۔

ادھر جمعیۃ علماء صوبہ دہلی کے صدر مولانا محمد قاسم نوری کی قیادت میں ایک وفد نے اجراڑہ پہنچ کر نمازِ جنازہ میں شرکت کی اور اہل خانہ سے گہری تعزیت کا اظہار کیا۔