ویڈیو: ادب نامہ میں منصور عثمانی کی شخصیت اور شاعری پر جامع گفتگو

نیشنل ہیرالڈ، نوجیوان اور قومی آواز کے مشترکہ ادبی پروگرام ادب نامہ کی تازہ نشست میں معروف شاعر منصور عثمانی کی شخصیت اور شاعری پر تفصیلی گفتگو پیش کی گئی۔ اس نشست میں مہمان کے طور پر قادرالکلام شاعر اور ناظم معین شاداب نے شرکت کی۔ گفتگو کے دوران منصور عثمانی کے خاندانی پس منظر، ابتدائی ادبی سفر اور ان کے والد گوہر عثمانی کی تربیت و رہنمائی کا خصوصی ذکر کیا گیا۔ معین شاداب نے بتایا کہ کس طرح منصور عثمانی نے ابتدا میں اپنے اشعار بغیر نام کے پیش کیے اور بعد ازاں ان کی شناخت ایک ابھرتے ہوئے شاعر کے طور پر ہوئی۔

نشست میں منصور عثمانی کے منتخب اشعار بھی پیش کیے گئے جن میں دل، زبان اور سماجی شعور کی جھلک نمایاں رہی۔ پروگرام میں ان کی نظامت کے انداز، ادبی بصیرت اور روایت سے جڑے رہنے کے رجحان پر بھی روشنی ڈالی گئی۔ اس موقع پر مقررین نے اس بات پر زور دیا کہ منصور عثمانی جدید اردو شاعری کی ایک اہم آواز ہیں، جنہوں نے اپنی تہذیبی جڑوں کے ساتھ فکری وسعت کو بھی برقرار رکھا۔