پاکستان: شہباز حکومت نے ہندوستان کے لیے فضائی حدود پر پابندیوں میں کی 24 مئی تک توسیع

پہلگام دہشت گردانہ حملے کی برسی سے قبل پاکستان کی شہباز شریف حکومت نے ہندوستان کے خلاف بڑا فیصلہ لیا ہے۔ پاکستان نے اپنی فضائی حدود میں ہندوستانی طیاروں پر عائد پابندی کو 24 مئی تک کے لیے بڑھا دیا ہے۔ گزشتہ سال 22 اپریل کو پہلگام میں ہوئے دہشت گردانہ حملے میں 26 لوگوں کی موت کے بعد ہندوستان اور پاکستان دونوں نے اپنی اپنی فضائی حدود ایک دوسرے کے لیے بند کر دیے تھے۔

پاکستان کی فضائی حدود 24 اپریل 2025 سے ہندوستانی طیاروں کے لیے بند ہے۔ جبکہ گزشتہ سال 30 اپریل سے پاکستانی طیاروں کو ہندوستانی فضائی حدود کا استعمال کرنے کی اجازت نہیں ہے۔ پاکستان ایئرپورٹ اتھارٹی نے ’نوٹس ٹو ایئرمین‘ (نوٹم) میں کہا ہے کہ تمام ہندوستانی رجسٹرڈ، لیز پر لیے گئے، کمرشل اور فوجی طیاروں کو 24 مئی 2026 کی صبح 5 بجے تک پاکستانی فضائی حدود میں داخل ہونے کی اجازت نہیں ہوگی۔

واضح رہے کہ تازہ نوٹس گزشتہ نوٹس کی آخری تاریخ 24 اپریل کو ختم ہونے سے چند روز قبل جاری کیا گیا۔ پاکستان کی فضائی حدود پر پابندی عائد کیے ہوئے تقریباً ایک سال ہو گیا ہے، جس کے باعث ہندوستانی طیاروں کو مختلف بین الاقوامی مقامات کے لیے طویل راستے اختیار کرنے پڑ رہے ہیں۔ ہندوستان نے پاکستانی طیاروں کو 24 اپریل کی صبح 5:30 بجے تک اپنی فضائی حدود کا استعمال کرنے سے روک رکھا ہے اور اس پابندی میں مزید اضافے کا امکان ہے۔

پہلگام دہشت گردانہ حملے کے بعد ہندوستانی حکومت کی طرف سے پاکستان کے خلاف اٹھائے گئے مختلف اقدامات کے ایک حصے کے طور پر لگائی گئی فضائی پابندی ابتدائی طور پر 24 مئی 2025 تک تھی اور بعد میں اسے ہر ماہ بڑھا دیا گیا۔ فضائی حدود کو اس سے قبل 1999 کے کارگل تنازعہ اور 2019 کے پلوامہ حملہ کے دوران بھی بند کیا گیا تھا۔

قابل ذکر ہے کہ پہلگام دہشت گردانہ حملے کے بعد ہندوستان نے ’سندھ آبی معاہدہ‘ کو منسوخ کر دیا تھا۔ وزیر اعظم مودی نے کہا تھا کہ خون اور پانی ایک ساتھ نہیں بہہ سکتے۔ اس کے علاوہ دونوں ممالک کے درمیان کاروبار کو مکمل طور پر ختم کر دیا گیا۔ اٹاری-واہگہ بارڈر کو فوری طور پر سیل کیا گیا اور ہندوستان نے پاکستان کو جاری کردہ ویزا بھی منسوخ کر دیا تھا۔ ہندوستان نے واضح کر دیا تھا کہ دونوں ممالک کے درمیان کوئی بھی معاہدہ سرحد پار دہشت گردی کے ختم ہونے کے بعد ہی ممکن ہے۔ اس کے بعد ہندوستانی فوج نے آپریشن سندور کو انجام دیا تھا، جس میں دہشت گردوں کے 9 ٹھکانے کو تباہ کیا گیا تھا، جبکہ 100 سے زائد دہشت گرد مارے گئے تھے۔