انسداد تمباکو نوشی کا عالمی دن: ’تمباکو چھوڑنے سے ایک سال میں دل کی بیماری کا خطرہ نصف ہو جاتا ہے‘، ڈبلیو ایچ او کا پیغام

تمباکو اور تمباکو نوشی سے پیدا ہونے والے سنگین طبی خطرات کے متعلق لوگوں میں بیداری پیدا کرنے کے لیے آج یعنی 31 مئی کو ’انسداد تمباکو نوشی کا عالمی دن‘ منایا جا رہا ہے۔ اس موقع پر عالمی ادارہ صحت (ڈبلیو ایچ او) نے ایک ہیلتھ ایڈوائزری جاری کر کے تمباکو چھوڑنے سے حاصل ہونے والے فوائد کے بارے میں بتایا ہے۔

ڈبلیو ایچ او نے سوشل میڈیا پلیٹ فارم ’ایکس‘ پر لکھا کہ ’’آج انسداد تمباکو نوشی کا عالمی دن ہے۔ تمباکو کا استعمال کرنے والوں میں سے تقریباً 60 فیصد لوگ اسے چھوڑنا چاہتے ہیں۔ شاید آپ بھی ان میں سے ایک ہوں۔ دنیا بھر میں یہ تعداد 75 کروڑ ہے۔ آپ باہمی تعاون اور مدد سے اپنے اس خواب کو سچ کر سکتے ہیں۔‘‘ عالمی ادارہ صحت نے مزید لکھا کہ ’’تمباکو چھوڑنے سے آپ کی صحت کو متعدد فوائد حاصل ہو سکتے ہیں۔ صرف 20 منٹ میں آپ کے دل کی دھڑکن معمول پر آ جاتی ہے۔ 2 سے 12 ہفتوں میں آپ کے پھیپھڑوں کی کارکردگی بہتر ہو جاتی ہے۔ اس کے علاوہ ایک سال میں دل کی بیماری کا خطرہ نصف رہ جاتا ہے۔ آپ اس لت سے چھٹکارا پا سکتے ہیں۔ مدد دستیاب ہے، آج ہی چھوڑیں!‘‘

اس سے قبل 29 مئی کو ڈبلیو ایچ او نے ایک آفیشیل بیان میں بتایا تھا کہ دنیا بھر میں 13 سے 15 سال کی عمر کے کم از کم 4 کروڑ بچے تمباکو کی مصنوعات کا استعمال کرتے ہیں۔ نوجوانوں میں ای سگریٹ اور نیکوٹین پاؤچ کا استعمال مسلسل بڑھ رہا ہے۔ عالمی ادارہ صحت دنیا بھر کی حکومتوں سے اپیل کرتا ہے کہ وہ نئی نسل کو تمباکو اور نیکوٹین کی مصنوعات کی لت سے بچائیں۔ ساتھ ہی ڈبلیو ایچ او نے وارننگ دی ہے کہ تمباکو اور نیکوٹین بنانے والی کمپنیاں جان بوجھ کر اپنی مصنوعات کو زیادہ پرکشش، استعمال میں آسان اور چھوڑنے میں مشکل بنانے کے لیے ان میں تبدیلیاں کر رہی ہیں۔

ڈبلیو ایچ او کے ہیلتھ ڈیٹرمیننٹس، پروموشن اینڈ پریوینشن ڈپارٹمنٹ کے ڈائریکٹر ڈاکٹر ایٹین کروگ نے کہا کہ تمباکو لاکھوں لوگوں کی جانیں لے رہا ہے، اس کے باوجود بڑی تمباکو کمپنیاں اپنے بزنس ماڈل کو نئی شکل دے رہی ہیں۔ وہ جان لیوا سگریٹ سے منافع کمانا جاری رکھے ہوئے ہیں، ساتھ ہی اگلی نسل کو لت لگانے کے مقصد سے فلیورڈ ای-سگریٹ، نیکوٹین پاؤچ اور دیگر نیکوٹین مصنوعات کو جارحانہ انداز میں فروغ دے رہی ہیں۔