’روس ناٹو ممالک پر ہائبرڈ حملہ کی فراق میں ہے‘، پولینڈ کے وزیر اعظم ڈونالڈ ٹسک نے کیا متنبہ

پولینڈ کے وزیر اعظم ڈونالڈ ٹسک نے خبردار کیا ہے کہ روس یوکرین کی حمایت کرنے والے یورپی ممالک، جن میں پولینڈ بھی شامل ہے، پر ڈرون یا راکٹ کے ذریعہ ’ہائبرڈ حملہ‘ کرنے کا منصوبہ بنا رہا ہے۔ ٹسک نے ناٹو، یوکرینی اور سی آئی اے سمیت امریکی خفیہ ایجنسیوں سے ملنے والی معلومات کی بنیاد پر جمعرات کے روز یہ دعویٰ کیا۔ پارلیمنٹ میں اپنی تقریر کے دوران ٹسک نے کہا کہ روس ان حملوں کو حادثہ یا اتفاقیہ واقعہ قرار دے گا، تاکہ حملے کا شکار ہونے والے رکن ملک کے دفاع کے لیے آگے آنے والے ناٹو ممالک کے حوصلے پست کیے جا سکیں یا کم از کم انہیں کمزور کیا جا سکے۔

پولینڈ کے وزیر اعظم ڈونالڈ ٹسک نے پارلیمنٹ میں کہا کہ اس بات کا حقیقی خطرہ ہے کہ ڈرون یا دیگر قسم کے پروجیکٹائل مشرقی محاذ کے ایک یا کئی ممالک کی سرحد میں داخل ہو کر تباہی مچا سکتے ہیں۔ ٹسک نے خبردار کیا کہ حملہ کے بعد روس کا سرکاری بیانیہ یہ ہوگا کہ یہ صرف ایک حادثہ ہے اور ناٹو کو کسی جوابی کارروائی کے بارے میں سوچنے کی ضرورت نہیں ہے۔ اس طرح روس ناٹو کے رکن ممالک کے دفاع کے جذبے کو کمزور کرنے کی کوشش کرے گا۔