پوپ لیو کینسر میں مبتلا، سرجری کے بعد داہنے پھیپھڑے کا ایک حصہ نکالا گیا

کیتھولک چرچ کے سربراہ پوپ لیو چودہویں پھیپھڑوں کے کینسر میں مبتلا پائے گئے ہیں، جس کے بعد روم کے جیمیلی اسپتال میں ان کی کامیاب سرجری کی گئی ہے۔ منگل (13 اکتوبر) کو تقریباً 90 منٹ تک چلی سرجری کے دوران ان کے داہنے پھیپھڑے کے نچلے حصے سے کینسر والی گانٹھ ہٹائی گئی اور سرجری کے بعد ان کی حالت فی الحال مستحکم ہے۔ ویٹیکن سٹی کی جانب سے جاری کردہ میڈیکل رپورٹ کے مطابق روٹین ہیلتھ چیک اپ کے دوران انہیں ’لَنگ اڈینو کارسینوما‘ کی تشخیص ہوئی، یہ پھیپھڑوں کے کینسر کا ایک عام قسم ہے۔

سرجری کے بعد 20 اکتوبر تک پوپ کے تمام عوامی اور مذہبی پروگرام منسوخ کر دیے گئے ہیں۔ آئندہ ماہ ان کے مجوزہ لیٹن امریکہ دورے پر بھی غیر یقینی صورتحال پیدا ہو گئی ہے، کیونکہ پوپ تقریباً ایک ہفتہ تک بیڈ ریسٹ پر رہیں گے۔ ان کی کامیاب سرجری کے بعد اب ڈاکٹر یہ جانچ کر رہے ہیں کہ کینسر جسم کے دوسرے حصوں میں تو نہیں پھیلا ہے۔ جارج ٹاؤن یونیورسٹی اسپتال میں شعبہ ہیمیٹولوجی-آنکولوجی کے سربراہ ڈاکٹر اسٹیفن لیو نے خبر رساں ایجنسی ’رائٹرز‘ سے کہا کہ اگر یہ پھیپھڑوں کا چھوٹا کینسر ہے، جس میں لمف نوڈز متاثر نہیں ہیں تو سرجری سے ہی علاج ممکن ہو سکتا ہے۔

قابل ذکر ہے کہ مئی 2025 میں پوپ فرانسس کے انتقال کے بعد پوپ لیو کو عیسائیوں کا سب سے بڑا مذہبی رہنما مقرر کیا گیا۔ ویٹیکن کے قوانین کے مطابق پوپ کے بیمار رہنے پر ان کا کوئی عبوری جانشین مقرر نہیں ہو سکتا ہے۔ اس دوران پوپ سے متعلق جو بھی کام یا فیصلے ہوں گے، انہیں ملتوی کر دیا جاتا ہے۔ پوپ کیتھولک عیسائی مذہب کے سب سے بڑے مذہبی پیشوا ہوتے ہیں۔ انہیں دنیا بھر کے کیتھولک عیسائیوں کا روحانی رہنما مانا جاتا ہے۔ پوپ کیتھولک چرچ کے سربراہ ہوتے ہیں اور دنیا بھر کے چرچوں، پادریوں اور بشپوں کی رہنمائی کرتے ہیں۔