نیوزی لینڈ: 3 ماہ کے بعد کورونا وائرس کے سبب پہلی موت

آکلینڈ: نیوزی لینڈ میں تین ماہ سے زیادہ عرصے کے بعد ایک بار پھر کورونا وائرس نے اس وقت دستک دی جب اس عالمی وبا کے سبب آکلینڈ شہر میں ایک شخص کی موت ہو گئی۔ جمعہ کے روز وزارت صحت کی جانب سے جاری بیان میں بتایا گیا ہے کہ "فوت ہونے والے شخص کی عمر 50 برس ہے۔ اگست میں کورونا سے متاثر ہونے والا یہ شہری آکلینڈ کے میڈلمور ہسپتال میں زیر علاج تھا"۔

طبی حکام کا کہنا ہے کہ فوت ہونے والا شخص ملک کے 102 دنوں تک کمیونٹی ٹرانسمِشن سے پاک رہنے کے بعد، آکلینڈ شہر میں اگست کے مہینے میں محسوس کی جانے والی اس وبا کی دوسری لہر کی زد میں آیا تھا۔ نیوزی لینڈ میں اس سے پہلے 24 مئی کو کورونا کے سبب کسی کی موت واقع ہوئی تھی۔

اس طرح نیوزی لینڈ میں اس وبائی مرض سے متاثر ہو کر موت کا شکار ہونے والے افراد کی مجموعی تعداد 23 ہو گئی ہے۔ یاد رہے کہ اس سے قبل آخری موت 24 مئی کو رپورت ہوئی تھی۔ آکلینڈ شہر میں اب تک کورونا وائرس کے کُل 152 مصدقہ کیس سامنے آ چکے ہیں۔ واضح رہے کہ آکلینڈ میں کورونا وائرس کے سبب نافذ العمل لاک ڈاؤن گذشتہ اتوار کی شام ختم کیا گیا تھا۔

محکمہ صحت کے سربراہ ایشلے بلوم فیلڈ نے کورونا سے ہونے موت کے بعد اپنے بیان میں کہا، ’’میں نیوزی لینڈ کے باشندگان اور متاثرہ خاندان کی اس بے چینی کو سمجھ سکتا جو وہ اس خبر کے بعد محسوس کر رہے ہیں۔ غم کے ان لمحات میں میری تعزیت لوگوں اور متاثر خاندان کے ساتھ ہیں۔‘‘

جمعہ کے روز فوت ہونے والا شخص نیوزی لینڈ میں کووڈ 19 میں مرنے والا سب سے کم عمر مانا جا رہا ہے۔ تاہم، صحت حکام نے یہ نہیں بتایا کہ آیا یہ شخص پہلے سے کسی مرض میں مبتلا تھا یا نہیں۔