ٹرمپ نے نیتن یاہو کو ملاقات کا وقت نہیں دیا، اسرائیلی وزیراعظم نے دورہ واشنگٹن منسوخ کردیا

امریکی صدر ڈونالڈ ٹرمپ اور اسرائیلی وزیر اعظم بنجامن نیتن یاہو کے درمیان تعلقات میں واضح دراڑ نظر آ رہی ہے۔ دو ہفتوں تک کوشش کرنے کے باوجود نیتن یاہو کو وائٹ ہاؤس میں ٹرمپ کے ساتھ ملاقات سے انکار کر دیا گیا۔ نتیجتاً نیتن یاہو نے اگلے ہفتے طے شدہ اپنا دورہ امریکہ منسوخ کر دیا۔

ڈیڑھ سال قبل ٹرمپ کے دوبارہ منتخب ہونے کے بعد سے، نیتن یاہو چھ مرتبہ اوول آفس کا دورہ کر چکے ہیں، جو کسی بھی دوسرے عالمی رہنما سے زیادہ ہے۔ ان میں سے ہر ایک ملاقات گھنٹوں یا دنوں میں ترتیب دی گئی تھی۔ اس بار، نیتن یاہو دو ہفتوں سے زیادہ وقت سے ملاقات کی کوشش کر رہے تھے، لیکن انکار کر دیا گیا۔ ٹرمپ نے اس ماہ کے شروع میں ایکسیوز کو بتایا کہ نیتن یاہو نے انہیں 250 ویں یوم آزادی کی مبارکباد دینے کے لیے فون کیا تھا اور وائٹ ہاؤس میں ان سے ملاقات کی خواہش ظاہر کی تھی۔

ٹرمپ نے تب کہا تھا کہ نیتن یاہو انقرہ میں نیٹو سربراہی اجلاس سے واپس آنے کے بعد ان سے ملاقات کر سکتے ہیں۔ جیسے جیسے دن گزرتے گئے، اور ٹرمپ سربراہی اجلاس سے واپس آئے، کوئی ملاقات طے نہیں تھی۔ سابق سینیٹر لنڈسے گراہم لنڈسے کی موت کی خبر کے بعد نیتن یاہو کے دفتر نے اعلان کیا کہ وہ آخری رسومات میں شرکت کرنا چاہتے ہیں۔ اس میں کہا گیا ہے کہ وہ پیر  یعنی20 جولائی کو ٹرمپ سے ملاقات کرنے والے تھے۔

نیتن یاہو کے دفتر نے اسرائیلی فضائیہ سے بھی کہا کہ وہ اپنا سرکاری طیارہ تیار رکھے اور پروٹوکول کے مطابق سکیورٹی اہلکاروں کی ایک پیشگی ٹیم واشنگٹن بھیجی۔ تاہم، جمعرات کی صبح  یعنی 16 جولائی کو نیتن یاہو کے دفتر نے اعلان کیا کہ ان کا منصوبہ بند دورہ منسوخ کر دیا گیا ہے کیونکہ گراہم لنڈسے کی آخری رسومات ملتوی کر دی گئی تھیں۔