سعودی عرب پر فضائی حملوں کا اثر، ایئر انڈیا نے 7 نومبر تک ریاض کی پروازیں کیں منسوخ

ہندوستانی سفارت خانے نے ہفتے کے روز بتایا کہ ایئر انڈیا اور ایئر انڈیا ایکسپریس کی ریاض اور دمام آمد و رفت کرنے والی پروازیں 7 نومبر تک معطل رہیں گی۔ وہیں جدہ کے لیے دونوں ایئر لائنز کی خدمات 31 اکتوبر تک بند رہیں گی۔ سفارت خانہ کے مطابق ریاض اور دمام کے لیے پروازوں کی معطلی جاری رہے گی، جبکہ جدہ کے لیے پروازیں مقررہ تاریخ تک فی الحال نہیں چلائی جائیں گی۔ یہ فیصلہ سعودی عرب میں شہری بنیادی ڈھانچے، خاص طور پر ریاض اور دمام کے ہوائی اڈوں پر مسلسل ہو رہے حملوں کے پیش نظر لیا گیا ہے۔ اس دوران ہندوستانی حکومت نے کہا ہے کہ سعودی عرب میں پھنسے ہندوستانی عمرہ زائرین کی واپسی کے لیے مسلسل کوششیں کی جا رہی ہیں۔

وزارت خارجہ کے مطابق ہندوستانی سفارت خانہ اور قونصل خانے متعلقہ ایئر لائنز اور ٹور آپریٹروں کے رابطے میں ہیں، تاکہ مسافروں کی جلد واپسی یقینی بنائی جا سکے۔ وزارت خارجہ کے ترجمان رندھیر جیسوال نے بتایا کہ گزشتہ ایک ہفتے کے دوران پھنسے ہوئے تقریباً 3000 عمرہ زائرین سعودی عرب سے ہندوستان واپس آ چکے ہیں۔ اس کے علاوہ 10000 سے زیادہ عام عمرہ زائرین بھی ہندوستان واپس آئے ہیں۔ انہوں نے کہا کہ باقی زائرین کی جلد واپسی کے لیے انتظامات پر بات چیت جاری ہے۔ ہندوستانی سفارت خانہ اور قونصل خانے پھنسے ہوئے لوگوں کے مسلسل رابطے میں ہیں اور رضاکاروں کے تعاون سے ان کی ہر ممکن مدد کر رہے ہیں۔

ترجمان نے بتایا کہ ریاض اور جدہ میں ہندوستانی شہریوں کی مدد کے لیے 24 گھنٹے کنٹرول روم بھی چلائے جا رہے ہیں۔ اس کے ساتھ ہی زمینی صورتحال سے آگاہ کرنے کے لیے باقاعدگی سے ایڈوائزری جاری کی جا رہی ہے۔ واضح رہے کہ ہندوستان نے حالیہ سعودی عرب میں شہری اور توانائی کے بنیادی ڈھانچے پر ہونے والے حملوں کی مذمت کی تھی۔ ان میں کنگ فہد بین الاقوامی ہوائی اڈے اور آرامکو کے شیبہ تیل کے میدان پر ہونے والے حملے شامل ہیں۔ وزارت خارجہ کے مطابق دمام ہوائی اڈے پر ہونے والے حملے میں ایک ہندوستانی شہری کی موت ہو گئی تھی، جبکہ دو دیگر ہندوستانی زخمی ہوئے تھے۔ وہیں شیبہ تیل علاقے پر ہونے والے حملے میں بھی ایک ہندوستانی شہری زخمی ہوا تھا۔ ہندوستان نے امید ظاہر کی ہے کہ خطے میں جلد ہی امن اور معمول کے مطابق حالات ہو جائیں گے۔