قطر فیکٹری دھماکہ میں 12 ہندوستانیوں کی ہلاکت پر حکومت ہند کا اظہارِ افسوس، وزیر خارجہ کا بیان آیا سامنے

قطر کے راس لفان انڈسٹریل سٹی میں ایک فیکٹری میں ہونے والے زوردار دھماکہ کے نتیجے میں 12 ہندوستانی شہریوں کی موت ہو گئی۔ اس حادثہ میں مجموعی طور پر 13 افراد ہلاک ہوئے ہیں۔ ہندوستانی شہریوں کی ہلاکت پر افسوس کا اظہار کرتے ہوئے وزیر خارجہ ایس جے شنکر نے کہا کہ ’’یہ انتہائی افسوس ناک واقعہ ہے۔ ہمارا سفارت خانہ قطری حکام کے رابطے میں ہے اور متاثرہ ہندوستانی شہریوں کے اہل خانہ کی مدد میں مصروف ہے۔‘‘

حادثہ کے بارے میں وزیر خارجہ ڈاکٹر ایس جے شنکر نے کہا کہ ’’قطر کے راس لفان انڈسٹریل سٹی میں ہونے والے دھماکہ میں ہندوستانی شہریوں سمیت متعدد افراد کی ہلاکت اور زخمی ہونے کی خبر سے بہت تکلیف ہوئی ہے۔ جیسے جیسے مزید معلومات سامنے آ رہی ہیں، ہمارا سفارت خانہ قطری حکام کے ساتھ مسلسل رابطے میں ہے۔ سفارت خانہ اس حادثے سے متاثرہ ہندوستانی شہریوں کے اہلِ خانہ کی مدد کی کوشش کر رہا ہے۔ ہماری ہمدردیاں اور دعائیں متاثرین اور ان کے خاندانوں کے ساتھ ہیں۔‘‘