نیوجرسی اور نیویارک میں منایا جائے گا ’انڈین انڈیپنڈنس ڈے‘، گورنر مِکی شیرل اور کیتھی ہوچل کا اعلان

امریکہ کی دو بڑی ریاستیں نیوجرسی اور نیویارک 15 اگست 2026 کو ’انڈین انڈیپینڈنس ڈے‘ (ہندوستانی یوم آزادی) منائیں گی۔ نیوجرسی کی گورنر مِکی شیرل اور نیویارک کی گورنر کیتھی ہوچل نے اس کا اعلان کیا۔ دونوں نے ہندوستان کے 79 ویں یوم آزادی کے حوالے سے ایک سرکاری اعلامیہ جاری کرتے ہوئے ہندوستان کی آزادی، جمہوری اقدار اور ہندوستانی نژاد امریکی برادری کے تعاون کو خراج تحسین پیش کیا۔

نیوجرسی کی گورنر نے اپنے اعلامیہ میں کہا ہے کہ 15 اگست 2026 ہندوستان کی آزادی کی 79 ویں سالگرہ ہے۔ یہ موقع دنیا کی سب سے بڑی جمہوریت کے طور پر ہندوستان کے تقریباً 8 دہائیوں کے سفر اور آزادی، خود اختیاری اور نمائندہ حکومت کی اقدار کا جشن ہے۔ گورنر نے ہندوستان کی تحریک آزادی میں حصہ لینے والے بے شمار لوگوں کی شجاعت، دور اندیشی اور قربانیوں کو بھی یاد کیا۔ انہوں نے کہا کہ ہندوستان کی پرامن تحریک آزادی دنیا بھر کی نسلوں کے لیے ایک تحریک بنی اور انصاف، مساوات و انسانی وقار کے آفاقی اصولوں کو مضبوط کیا۔

نیوجرسی میں مقیم ہندوستانی نژاد امریکی برادری کی خاص طور پر ستائش کرتے ہوئے مزید کہا گیا ہے کہ ریاست میں رہنے والی ہندوستانی نژاد امریکی برادری معاشرے کے تقریباً ہر شعبے میں نمایاں کردار ادا کر رہی ہے۔ تعلیم، صحت عامہ، تحقیق، انجینئرنگ، کاروبار، عوامی خدمات، فوج، فنون اور سماجی قیادت جیسے شعبوں میں ہندوستانی نژاد امریکیوں کے کردار کو نمایاں کیا گیا ہے۔ گورنر شیرل نے کہا کہ ہندوستانی نژاد امریکی برادری نے اپنی صلاحیت، جدت طرازی، قیادت اور عوامی خدمت کے جذبے کے ذریعے نیوجرسی کی ثقافتی، اقتصادی، تعلیمی، سائنسی، طبی اور شہری زندگی کو مالامال کیا ہے۔

سرکاری اعلامیہ میں ہندوستان اور امریکہ کے درمیان مضبوط ہوتے تعلقات کا بھی ذکر کیا گیا ہے۔ اس میں کہا گیا ہے کہ دونوں ممالک کی دوستی جمہوری اداروں، قانون کی بالادستی، جدت طرازی، اقتصادی مواقع اور بنیادی آزادیوں کے تئیں مشترکہ عزم پر مبنی ہے۔ تعلیم، تجارت، ٹیکنالوجی، صحت اور ثقافتی تبادلے جیسے شعبوں میں دونوں ممالک کے مابین تعاون کو بھی اہم قرار دیا گیا ہے۔ گورنر نے کہا کہ ہندوستان کا یوم آزادی نیوجرسی کے تمام لوگوں کے لیے ہندوستان کی تاریخ، اس کی استقامت اور کامیابیوں کو خراج تحسین پیش کرنے اور ہندوستانی نژاد امریکی برادری کے تعاون کو تسلیم کرنے کا ایک بہترین موقع ہے۔

قابل ذکر ہے کہ اعلامیہ میں اس بات پر بھی زور دیا گیا کہ تنوع، باہمی احترام اور شہریوں کی شمولیت معاشروں اور جمہوریت کو مضبوط بناتے ہیں۔ ساتھ ہی ہندوستانی نژاد امریکی برادری نیوجرسی کے مستقبل کو سنوارنے میں مسلسل اہم کردار ادا کر رہی ہے۔ دوسری جانب نیویارک کی گورنر نے بھی ہندوستان-امریکہ تعلقات اور جمہوری اقدار کی تعریف کی ہے۔ انہوں نے بھی امریکہ کو ثقافتی اور اقتصادی طور پر مضبوط بنانے میں ہندوستانیوں کے تعاون کی ستائش کی ہے۔