اہم خبر: کشمیر میں دہشت گردوں کے ذریعہ یرغمال شخص آزاد، تصادم میں ایک فوجی شہید

جموں و کشمیر کے رام بن واقع بٹوت علاقے میں یرغمال بنائے گئے ایک شہری کو سیکورٹی فورسز نے محفوظ نکال لیا ہے۔ اس آپریشن میں فوج کا ایک جوان شہید ہو گیا اور دو پولس اہلکار زخمی بھی ہو گئے۔

دہلی کی کیجریوال حکومت نے ’سفل اسٹورس‘ پر 23.90 روپے فی کلو پیاز دستیاب کرا دیا ہے۔ لوگوں کی قطار سفل اسٹورس پر پیاز خریدنے کے لیے لگی ہوئی ہے۔ ایک شخص کو 5 کلو تک پیاز خریدنے کی اجازت دی گئی ہے۔ ایسے وقت میں جب کہ دہلی میں پیاز کئی مقامات پر 70 روپے کلو فروخت ہو رہا ہے، کیجریوال حکومت کے ذریعہ سفل اسٹورس پر سستی شرح میں پیاز دستیاب کرائے جانے سے لوگ کافی خوش ہیں۔

جموں و کشمیر کے گاندربل میں دہشت گردوں کے ساتھ سیکورٹی فورس کی تصادم کی خبر ہے۔ موصولہ جانکاری کے مطابق سیکورٹی فورسز نے جوابی کارروائی میں ایک دہشت گرد کو مار گرایا، جب کہ دو دیگر دہشت گردوں کو گھیر لیا ہے۔ مارے گئے دہشت گرد کے پاس سے سیکورٹی فورسز نے اسلحہ برآمد کیا ہے۔ یہاں کے آس پاس کے علاقوں میں فوج اور جموں پولس جوائنٹ سرچ آپریشن چلا رہی ہے۔

کانگریس نے آسام، چھتیس گڑھ اور پڈوچیری میں ہونے والے ضمنی اسمبلی انتخاب کے لیے اپنے امیدواروں کا اعلان کر دیا ہے۔ کانگریس نے جون کمار کو پڈوچیری کے کامراج اسمبلی حلقہ سے امیدوار بنایا ہے۔ آسام کے لیے کیشب رجک کو رتن بری اسمبلی حلقہ، شمس الحق کو جانیا اسمبلی حلقہ، کارتک کرنی کو رانگ پارا اسمبلی حلقہ، سشیل سری کو سوناری اسمبلی حلقہ سے امیدوار بنایا گیا ہے۔ چھتیس گڑھ کے چترکوٹ اسمبلی حلقہ سے راج من بینزم کو امیدوار بنایا گیا ہے۔

اتر پردیش کے وزیر اعلیٰ یوگی آدتیہ ناتھ نے اپنی رہائش پر جموں و کشمیر سے وابستہ طلباء سے ملاقات کی۔ انھوں نے اس ملاقات کے دوران کہا کہ ’’آج آپ یہاں طالب علم ہیں، ممکن ہے کل یہاں کی انتظامیہ کا حصہ بنیں۔‘‘ انھوں نے مزید کہا کہ ’’ہم ایک جمہوری سوسائٹی میں رہ رہے ہیں جہاں کمیونکیشن بہت اہم ہے۔‘‘

پٹرول اور ڈیزل کی قیمتوں میں لگاتار اضافہ ہو رہا ہے جس سے عام لوگ پریشان ہیں۔ اس لگاتار بڑھتی قیمتوں پر کانگریس نے مودی حکومت کو تنقید کا نشانہ بنایا ہے۔ اپنے آفیشیل ٹوئٹر ہینڈل سے کانگریس نے ٹوئٹ کیا ہے کہ تیل کی قیمتوں میں لگاتار 10ویں دن اضافہ ہوا ہے اور مرکزی حکومت کا اس طرف کوئی دھیان نہیں ہے۔ کانگریس نے مزید کہا کہ ’’وزیر اعظم اور مرکزی وزیر برائے مالیات کی طرف سے اس سلسلے میں ایک بھی لفظ نہیں بولا گیا ہے، حالانکہ تیل کی بڑھتی قیمتیں کاروباریوں اور عام آدمی کو متاثر کر رہی ہیں۔‘‘

آج 28 ستمبر کو بھگت سنگھ کی پیدائش کا دن ہے۔ بھگت سنگھ 28 ستمبر 1907 کو پیدا ہوئے تھے جب کہ 23 مارچ 1931 کو وہ ہندوستان کی آزادی کے لیے شہید ہو گئے۔ اس موقع پر کانگریس نے ٹوئٹ کر انھیں خراج عقیدت پیش کیا ہے۔ کانگریس نے ٹوئٹ میں لکھا ہے کہ ’’اپنے حوصلے اور جذبے سے تحریک آزادی کا رخ بدلنے والے عظیم ہیرو ویر بھگت سنگھ جی کے جنم دن پر ملک کا سلام۔ آج بھگت سنگھ کے خوابوں کا ہندوستان بنانے کی ذمہ داری نوجوان طبقہ پر ہے، جسے بخوبی نبھانے کی ضرورت ہے۔‘‘

امریکہ کے ٹیکساس میں ہند نژاد کے پہلے سکھ پولس افسر کا بے رحمی سے قتل کر دیا گیا۔ ملزم نے پولس افسر پر کئی راؤنڈ کی فائرنگ کی جس میں ان کی موت ہو گئی۔ مقامی پولس نے مہلوک سکھ پولس افسر کی پہچان سندیپ سنگھ دھالیوال کے شکل میں کی ہے۔ وہ گزشتہ 10 سال سے امریکی پولس سے وابستہ تھے۔

وزارت برائے امور خارجہ کے سکریٹری اول ودیشا میترا نے اقوا متحدہ میں پاکستان کی دھجیاں اڑا کر رکھ دی ہیں۔ انھوں نے اقوا متحدہ میں جواب دینے کا حق استعمال کرتے ہوئے پاکستان میں موجود مسائل اور حکومت کی خامیوں کو سب پر عیاں رکھ دیا، اور ہندوستان میں ہو رہی ترقی کا ثبوت بھی پیش کیا۔ انھوں نے ایک بیان میں یہ بھی کہا کہ ’’دنیا کو پاکستان میں جا کر حالات دیکھنا چاہیے۔ پاکستان دہشت گردی کو فروغ دینے پر زور دے رہا ہے جب کہ ہم ترقی کی کوششوں میں لگے ہیں۔ پاکستان کو 1971 کے نیازی کا قتل عام نہیں بھولنا چاہیے۔‘‘