ممبئی: حیدرآباد میں ’مویشی ڈاکٹر‘ کی اجتماعی عصمت دری، قتل اور نذرِآتش کرنے کے ملزمین کی مبینہ پولس انکاونٹر میں ہوئی موت پر رد عمل ظاہر کرتے ہوئے راشٹروادی کانگریس پارٹی (این سی پی) کے قومی ترجمان نواب ملک نے کہا ہے کہ انصاف تو ہوا مگر طریقہ کار ناانصافی والا اختیار کیا گیا۔
میڈیا کے لئے جاری اپنے بیان میں انہوں نے کہا کہ عدالتی طریقہ کار کو مکمل کرتے ہوئے ملزمین کو اگر پھانسی دی گئی ہوتی تو لوگوں کے دلوں میں خوف پیدا ہوا ہوتا۔ انہوں نے کہا کہ انصاف کرنے کا یہ طریقہ غلط ہے اور ناانصافی کا طریقہ استعمال کرتے ہوئے انصاف دیا جانا مناسب نہیں ہے۔
Published: 06 Dec 2019, 8:25 AM IST
حیدر آباد انکاؤنٹر کے بعد پورے ملک میں ایک زبردست بحث شروع ہو گئی ہے۔ کچھ لوگ اس انکاؤنٹر کو صحیح قرار دے رہے ہیں تو کچھ لوگ پولس کی کارروائی پر سوال بھی اٹھا رہے ہیں۔ مغربی بنگال سے بی جے پی رکن پارلیمنٹ لاکٹ چٹرجی نے اس انکاؤنٹر کو درست ٹھہراتے ہوئے کہا ہے کہ اس طرح کے انکاؤنٹرس کو قانونی شکل دی جانی چاہیے۔
Published: 06 Dec 2019, 8:25 AM IST
حیدرآباد: اجتماعی عصمت دری اور قتل واقعہ کے ملزمین کی انکاؤنٹر میں ہلاکت کے بعد اُن کی لاشوں کا پوسٹ مارٹم حیدرآباد کے گاندھی اسپتال میں کیا گیا۔ لاشوں کو پوسٹ مارٹم کے لیے لے جانے سے قبل انکاؤنٹر کی جگہ پر ہلاک ملزمین کے خاندان والوں کو لایا گیا جہاں عوام کی بڑی تعداد پہلے سے ہی جمع تھی۔ انکاؤنٹر کے مقام پر عوام نے پولس پر پھولوں کی بارش بھی کی۔ خواتین کی بیشتر تنظیمیں بھی وہاں پہنچیں جنہوں نے مقتولہ کو خراج پیش کیا۔
Published: 06 Dec 2019, 8:25 AM IST
حیدر آباد پولس نے اس جگہ کی تصویر جاری کی ہے جہاں انکاؤنٹر میں عصمت دری و قتل واقعہ کے چاروں ملزمین کو مارا گیا۔ جائے وقوع پر اب بھی لاش موجود ہے اور جلد ہی ان لاشوں کو پوسٹ مارٹم کے لیے بھیج دیا جائے گا۔ اس وقت جائے وقوع پر فورنسک ٹیم کے ذریعہ جانچ کی کارروائی چل رہی ہے۔ کچھ ایسی تصویریں بھی سامنے آئی ہیں جس میں ملزم کے ہاتھ میں پستول ہے۔
Published: 06 Dec 2019, 8:25 AM IST
کانگریس کے سینئر لیڈر اور سینئر وکیل پی چدمبرم نے حیدر آباد انکاؤنٹر پر اپنا رد عمل ظاہر کیا ہے۔ انھوں نے میڈیا کے ایک سوال کا جواب دیتے ہوئے کہا کہ ’’مجھے معلوم نہیں کہ حیدر آباد میں واقعی میں کیا کچھ ہوا ہے۔ ایک ذمہ دار انسان کے طور پر میں کہوں گا کہ اس بات کی جانچ ہونی چاہیے کہ حیدر آباد انکاؤنٹر کیا حقیقی معنی میں ایک انکاؤنٹر تھا۔ اس کا پتہ لگانا چاہیے کہ کیا سچ میں ملزمین فرار ہونے کی کوشش کر رہے تھے یا کوئی دوسری بات ہے۔‘‘
Published: 06 Dec 2019, 8:25 AM IST
واشنگٹن: امریکہ کی مینیسوٹا ریاست کے سینٹ کلاؤڈ شہر میں ایک ہیلی کاپٹر کے حادثے کا شکار ہونے کے سبب امریکی نیشنل گارڈ کے تین اہلکار ہلاک ہو گئے۔ امریکی فوجی افسروں نے جمعہ کو یہ اطلاع دی۔ مینیسوٹا نیشنل گارڈ نے ٹویٹ کر کے بتایا کہ اس کا جمعرات کی دوپہر يوایچ -60 بلیک ہاک ہیلی کاپٹر کے ساتھ رابطہ ٹوٹ گیا تھا۔ اس وقت اس ہیلی کاپٹر نے سینٹ کلاؤڈ میں مینٹیننس ٹیسٹ کے لئے پرواز بھری تھی۔ ایک مزیدٹویٹ میں مینیسوٹا نیشنل گارڈ نے حادثے میں تین فوجی اہلکار وں کے ہلاک ہونے کی تصدیق کی ہے۔ افسروں نے کہا ہیلی کاپٹر کے حادثے کا شکار ہونے کے وجوہات کی جانچ کی جا رہی ہے۔
(یو این آئی)
Published: 06 Dec 2019, 8:25 AM IST
بھوپال: تلنگانہ میں ایک لڑکی کی آبروریزی اور قتل معاملے کے سبھی چاروں ملزمان کو آج پولس تصادم میں ہلاک کرنے کے واقعہ پر بی جے پی کے سینئر لیڈر اور مدھیہ پردیش کے سابق وزیر اعلی شیوراج سنگھ چوہان نے کہا کہ ’’جو جس کین تو تس پھل چاكھو‘۔ مسٹر چوہان نے اپنے ٹوئٹس میں کہا کہ حیدر آباد میں وحشیوں کو ان کے گناہ کی سزا ملی۔ پورے ملک کو بڑا سکون ملا۔ وحشیوں کے ساتھ یہی سلوک ہونا چاہئے۔‘‘ شیوراج چوہان نے اپنا ایک ویڈیو بھی شیئر کیا ہے جس میں انہوں نے کہا کہ ’’اس تصادم کے بعد پورے ملک نے چین کی سانس لی ہے۔‘‘ شیوراج چوہان کا کہنا ہے کہ تصادم پر سوال اٹھانے والوں کو بیٹی کے ساتھ پیش آئے واقعہ کے بارے میں پہلے سوچنا چاہئے۔
Published: 06 Dec 2019, 8:25 AM IST
اتر پردیش کے اناؤ میں عصمت دری متاثرہ کو نذرِ آتش کیے جانے کا معاملہ آج پھر لوک سبھا میں ہنگامہ کا سبب بنا۔ اس واقعہ کے خلاف کانگریس اراکین پارلیمنٹ نے ایوان سے واک آؤٹ کیا۔ قابل ذکر ہے کہ اناؤ عصمت دری متاثر کے ملزمین نے گاؤں کے باہر اسے زندہ جلا دیا تھا۔ فی الحال اس کا علاج صفدر جنگ اسپتال میں چل رہا ہے جہاں اس کی حالت انتہائی سنگین بنی ہوئی ہے۔
Published: 06 Dec 2019, 8:25 AM IST
بی جے پی رکن پارلیمنٹ اور سابق مرکزی وزیر مینکا گاندھی نے حیدر آباد انکاؤنٹر کی خبر سننے کے بعد پولس محکمہ پر انگلی اٹھائی ہے۔ انھوں نے میڈیا سے بات چیت کے دوران کہا کہ ’’جو ہوا ہے بہت بھیانک ہوا ہے۔ ملک کے لیے یہ ٹھیک نہیں۔ آپ قانون کو اپنے ہاتھوں میں نہیں لے سکتے۔ عدالت کے ذریعہ آخر میں ان سبھی (ملزمین) کو پھانسی کی سزا ملنے ہی والی تھی۔‘‘ انھوں نے مزید کہا کہ ’’اگر آپ قانون اور ضابطوں پر عمل کیے بغیر ملزمین کو گولی مارنے کے لیے جاتے ہیں، تو پھر عدالت، قانون اور پولس کا کیا مطلب ہے؟‘‘
Published: 06 Dec 2019, 8:25 AM IST
حیدر آباد: شہر حیدرآباد کے سائبر آباد پولیس کمشنریٹ کے حدود میں 26 سالہ ویٹنری ڈاکٹر کی اجتماعی عصمت دری کے بعد اس کے قتل اور لاش کو جلا دینے کی واردات میں ملوث تمام چار ملزمین انکاونٹر میں ہلاک ہو گئے ہیں۔ ان کی ہلاکت پر ملزمین کے خاندان والوں نے شبہات کا اظہار کیا ہے۔ ملزم عارف اور چنا کیشولو کی ماں نے کہا کہ ان کے بیٹوں سے ناانصافی کی گئی۔ یہ دونوں مائیں انکاؤنٹر میں ان کے بیٹوں کی ہلاکت کی اطلاع پر غمزدہ ہو گئیں اور ان کی آنکھوں سے آنسو رواں ہو گئے۔ انہوں نے کہا کہ عدالت کی جانب سے ان کو سزا دی جانی چاہئے تھی۔ تاہم پولس نے ناانصافی کرتے ہوئے ان کو ہلاک کیا ہے۔ انہوں نے اس انکاؤنٹر کو غلط اور غیر منصفانہ قرار دیا۔
(یو این آئی)
Published: 06 Dec 2019, 8:25 AM IST
حیدر آباد پولس کی گاڑیوں پر لوگوں کے ذریعہ پھول برسائے جانے کی خبریں موصول ہو رہی ہیں۔ عوام میں اس بات کو لے کر خوشی ہے کہ خاتون ویٹنری ڈاکٹر کی عصمت دری اور جلا کر اسے ہلاک کرنے والے چاروں ملزمین کو پولس نے انکاؤنٹر میں ہلاک کر دیا۔
Published: 06 Dec 2019, 8:25 AM IST
حیدر آباد پولس کے ذریعہ ویٹنری ڈاکٹر کی عصمت دری اور قتل کے ملزمین کو انکاؤنٹر میں ہلاک کیے جانے کے بعد کچھ لوگوں میں بہت خوشی دیکھنے کو مل رہی ہے تو کچھ لوگ یہ کہہ رہے ہیں کہ انھیں قانون کے مطابق سزا ملتی تو زیادہ بہتر ہوتا۔ حیدر آباد پولس کے ذریعہ انکاؤنٹر کی خبر ملنے کے بعد بیڈمنٹن کھلاڑی سائنا نہوال نے بھی اپنا رد عمل ظاہر کیا ہے۔ انھوں نے ٹوئٹر پر حیدر آباد پولس کی تعریف کرتے ہوئے لکھا ہے ’’حیدر آباد پولس نے بہترین کام کیا... ہم آپ کو سلام کرتے ہیں۔‘‘
Published: 06 Dec 2019, 8:25 AM IST
حیدر آباد پولس کے ذریعہ ویٹنری ڈاکٹر کی عصمت دری اور قتل کے چاروں ملزمین کو انکاؤنٹر میں ہلاک کر دیا گیا ہے۔ اس خبر کو سننے کے بعد ’نربھیا‘ کی ماں نے خوشی کا اظہار کیا ہے۔ انھوں نے میڈیا سے بات کرتے ہوئے کہا کہ ’’میں بہت خوش ہوں، انصاف مل گیا۔‘‘
Published: 06 Dec 2019, 8:25 AM IST
حیدر آباد پولس کے ذریعہ انکاؤنٹر میں ویٹنری ڈاکٹر کی عصمت دری اور قتل کے چاروں ملزمین کو ہلاک کیے جانے کے بعد بی ایس پی سربراہ مایاوتی کا رد عمل سامنے آیا ہے۔ انھوں نے میڈیا سے کہا کہ ’’خواتین کے خلاف اتر پردیش میں لگاتار جرائم ہو رہے ہیں، لیکن ریاستی حکومت اور پولس انتظامیہ سو رہی ہے۔ اتر پردیش پولس اور دہلی پولس دونوں کو حیدر آباد پولس سے سبق سیکھنا چاہیے۔‘‘ انھوں نے مزید کہا کہ ’’بدقسمتی سے اتر پردیش میں جرائم پیشوں کے ساتھ ریاستی مہمان کی طرح سلوک کیا جاتا ہے، اتر پردیش میں اس وقت جنگل راج ہے۔‘‘
Published: 06 Dec 2019, 8:25 AM IST
حیدر آباد میں خاتون ویٹنری ڈاکٹر کی عصمت دری اور قتل معاملے میں چاروں ملزمین کو آج حیدر آباد پولس نے صبح ایک تصادم کے دوران ہلاک کر دیا۔ اس واقعہ کے بعد متاثرہ خاتون ڈاکٹر کے والد کا بیان سامنے آیا ہے۔ انھوں نے کہا کہ ’’میری بیٹی کو مرے ہوئے دس دن گزر چکے ہیں۔ میں پولس اور حکومت کا شکار گزار ہوں کہ انھوں نے صحیح قدم اٹھایا۔ میری بیٹی کی روح کو اب سکون ملا۔‘‘
Published: 06 Dec 2019, 8:25 AM IST
حیدر آباد عصمت دری اور قتل معاملے کے ملزمین کی پولس تصادم میں موت ہو گئی ہے۔ اس انکاؤنٹر کے بعد پولس کے سینئر افسران جائے واقعہ پر پہنچے۔ تلنگانہ میں خاتون ویٹنری ڈاکٹر کے ساتھ عصمت دری اور قتل کے سبھی چار ملزمین پولس کے ساتھ تصادم میں مارے گئے۔ پولس ملزمین کو جرائم کی جگہ پر لے گئی تھی، اسی دوران ملزمین نے بھاگنے کی کوشش کی۔ اس کے بعد ان پر گولی چلائی گئی۔ میڈیا ذرائع کے مطابق پولس چاروں ملزمین کو کرائم سین سمجھنے کے لیے نیشنل ہائی وے 44 لے کر گئی تھی جہاں انھوں نے فرار ہونے کی کوشش کی۔ یہ دیکھ کر پولس نے انھیں انکاونٹر میں ہلاک کر دیا۔
Published: 06 Dec 2019, 8:25 AM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 06 Dec 2019, 8:25 AM IST
تصویر: پریس ریلیز