ہماچل پردیش: مودی کی ریلی میں جا رہی طلباء سے بھری بس حادثہ کی شکار، 35 زخمی

ہماچل پردیش کے دھرم شالہ میں پی ایم مودی کی ریلی میں شریک ہونے جارہے طلباء سے بھری ایک بس حادثے کی شکار ہوگئی ہے، کانگڑا کے ضلع لنج میں یہ حادثہ رونما ہوا ہے، حادثہ اس قدر شدید تھا کہ آس پاس کے لوگ فوراً جائے واردات پر پہنچ گئے اور زخمیوں کی مدد کرنے لگے، اطلاع ملتے ہی مقامی انتظامیہ و پولس جائے واردات پر پہنچ گئی، خبروں کے مطابق جائے حادثہ پر کوئی سہولت نہ ہونے کے سبب زمین پر لٹا کر ہی طلبا کا ابتدائی علاج کیا گیا، بعد میں ان زخمی طلباء کو سی ایچ سی میں علاج کے لئے بھرتی کرایا گیا ہے۔ اطلاع کے مطابق بس میں کمپیوٹر سینٹر کے 35 طلبا سوار تھے جو کہ اس حادثہ میں زخمی ہوگئے ہیں۔

ابتدائی اطلاع کے مطابق ایكلویہ کمپیوٹر سینٹر کے طلبا پی ایم نریندر مودی کی ریلی میں شامل ہونے کے لئے دھرم شالہ جا رہے تھے کہ لنج کے مقام پر ان کی بس حادثہ کی شکار ہوگئی، زخمیوں کا علاج اسپتال میں کیا جا رہا ہے، تمام زخمی ہونے والے طلبا کی عمر 20 سے 24 سال کے درمیان کی بتائی جا رہی ہے۔

ابتدائی معلومات میں پتہ چلا ہے کہ 5 شدید زخمی طلبا کو ٹانڈا میڈیکل کالج بھیجا گیا ہے، فی الحال حادثے کی وجوہات کا پتہ نہیں چل پایا ہے۔