اہم خبر: جنگ آزادی کی طرح ہمیں شہریت قانون کے خلاف بھی لڑنا ہوگا... ہرش مندر

نومنظور شہریت قانون 2019 کے خلاف تحریکوں اور احتجاجی مظاہروں کا سلسلہ دراز ہوتا جا رہا ہے۔ آج راجدھانی دہلی کے جنتر منتر پر کئی معروف سماجی کارکنوں نے اس قانون کے خلاف اپنی بات رکھی۔ اس احتجاجی مظاہرہ میں سابق آئی اے ایس افسر ہرش مندر بھی موجود تھے۔ انھوں نے وہاں موجود لوگوں سے خطاب کرتے ہوئے کہا کہ ’’ہم نفرت کے خلاف لڑ رہے ہیں، ہمیں آزادی کی لڑائی کی طرح سی اے بی (اب شہریت قانون) کے خلاف لڑنا ہوگا۔ ہم کھل کر اس قانون کی مخالفت کرتے ہیں۔ ہمیں یہ قانون بار بار توڑنا ہے۔ اس قانون کو توڑنے کی سزا بھی قبول کرنی ہوگی۔ یہ ضد کرنا ہوگا۔ ایک بھی مسلمان کی شہریت چھینی جائے گی تو ہم سبھی کو مل کر ڈیٹنشن سنٹر جانا ہوگا۔‘‘

ہرش مندر نے اپنی بات لوگوں کے سامنے رکھتے ہوئے واضح لفظوں میں کہا کہ ’’حکومت کی دشمنی مسلمانوں سے، بایاں محاذ نظریہ رکھنے والوں سے اور آئین سے ہے۔ اس حکومت نے آئین کو منہدم کر دیا ہے۔ اس ملک کے ہندو ’بائے چانس‘ انڈین ہیں جب کہ مسلمان ’بائے چوائس‘ یعنی اپنی پسند سے انڈین ہیں۔ اس لیے ان پر کوئی شک مت کیجیے۔ میں اس قانون کے خلاف خود کو سرکاری دستاویزوں میں مسلمان اعلان کروں گا۔‘‘

حیدر آباد میں 18 سالہ لڑکی کے اغوا اور عصمت دری معاملہ میں تلنگانہ پولس کو کامیابی ملی ہے۔ اس نے اس معاملے سے جڑے دو لوگوں کو گرفتار کیا ہے اور پوچھ تاچھ کر رہی ہے۔ پولس کو امید ہے کہ جلد انھیں اغوا اور عصمت دری سے متعلق اہم جانکاری ان دونوں سے ملے گی۔

شہریت قانون کے خلاف پورے ملک میں احتجاجی مظاہرے جاری ہیں۔ مغربی بنگال میں بھی مظاہرے ہو رہے ہیں اور وہاں بھی مظاہروں نے پرتشدد شکل اختیار کر لیا ہے۔ میڈیا ذرائع کے مطابق کئی بسوں کو تو نذر آتش کیا ہی گیا ہے، کئی ریلوے اسٹیشنوں پر بھی آگ زنی ہوئی ہے۔

دہلی میٹرو ریل کارپوریشن (ڈی ایم آر سی) نے جن پتھ اور جامعہ ملیہ اسلامیہ میٹرو اسٹیشن کے دروازے بند ہونے کی خبر دی ہے۔ ڈی ایم آر سی کا کہنا ہے کہ دہلی پولس کے مشورے کے مطابق یہ قدم اٹھایا گیا ہے اور ان اسٹیشنوں پر میٹرو ریل نہیں رکے گی۔ بتایا جا رہا ہے کہ یہ قدم شہریت قانون مخالف مظاہروں کو دیکھ کر اٹھایا گیا ہے کیونکہ ان اسٹیشنوں پر مظاہرین کے ذریعہ ہنگامہ کیے جانے کا اندیشہ ہے۔

دہلی-این سی آر کے لوگوں کو ایک بار پھر مہنگائی کی مار پڑی ہے۔ خبروں کے مطابق مدر ڈیری نے دودھ کی قیمت میں اضافہ کرنے کا فیصلہ کیا ہے۔ بتایا جا رہا ہے کہ مدر ڈیری نے فی لیٹر قیمت میں 3 روپے اضافہ کا فیصلہ کیا ہے اور یہ نئی شرح اتوار سے نافذ العمل ہوگی۔

پبلک سیفٹی ایکٹ یعنی پی ایس اے کے تحت نظر بند نیشنل کانفرنس لیڈر فاروق عبداللہ کو فی الحال اس نظربندی سے آزادی ملتی ہوئی نظر نہیں آ رہی ہے۔ میڈیا ذرائع کے مطابق ان کی نظربندی میں مزید 3 ماہ کا اضافہ کر دیا گیا ہے۔

پی ایم نریندر مودی آج دوپہر بعد اتر پردیش میں کانپور واقع اٹل گھاٹ پہنچے تھے جہاں سیڑھیوں پر چڑھتے ہوئے وہ اچانک گر پڑے۔ اس واقعہ کا ویڈیو سوشل میڈیا پر وائرل ہو رہا ہے۔ سوشل میڈیا پر شیئر ہو رہے ویڈیو میں صاف دیکھنے کو مل رہا ہے کہ وہ اچانک گر پڑے اور انھیں ان کے ساتھ چل رہے سیکورٹی گارڈس نے فوراً اٹھایا۔ اس ویڈیو کی تصدیق قومی آواز نہیں کرتا ہے۔

آل انڈیا مجلس اتحاد المسلمین کے سربراہ اسدالدین اویسی نے شہریت (ترمیمی) قانون کو چیلنج پیش کرتے ہوئے سپریم کورٹ میں ایک عرضی داخل کی ہے۔ یہ جانکاری وکیل نظام پاشا نے میڈیا کو دی۔ انھوں نے کہا کہ اسدالدین اویسی نے اس قانون کے خلاف سپریم کورٹ میں عرضی داخل کیا ہے جس میں نو منظور شدہ شہریت قانون کو ہندوستانی آئین کے خلاف بتایا گیا ہے۔

امریکہ اور کناڈا نے اپنے شہریوں سے اپیل کی ہے کہ وہ شمالی ہندوستان کے سفر سے پرہیز کریں۔ کناڈا کے سفارت خانہ نے ہفتہ کی صبح اپنے شہریوں کے لیے ایڈوائزری جاری کی۔ اس میں کہا گیا ہے کہ اروناچل پردیش کا سفر کرنے سے عوام بچیں۔ غور طلب ہے کہ ہندوستان کی شمال مشرقی ریاستوں میں نومنظور شدہ شہریت قانون کے خلاف پرتشدد مظاہرے ہو رہے ہیں۔ اس بات کو دھیان میں رکھتے ہوئے ہی امریکہ اور کناڈا نے یہ ایڈوائزری جاری کی ہے۔