اناؤ: جلی حالت میں خاتون کی لاش برآمد، عصمت دری کے بعد قتل کا خدشہ

اتر پردیش کے اناؤ ضلع میں خاتون کے ساتھ اجتماعی عصمت دری اور اس کے والد کے قتل کا معاملہ ابھی ٹھنڈا بھی نہیں ہوا تھا کہ وہاں ایک اور خاتون کی لاش جلی ہوئی حالت میں برآمد ہونے کی وجہ سے ہنگامہ ہو گیا ہے۔ خدشہ ظاہر کیا جا رہا ہے کہ عصمت دری کے بعد خاتون کا قتل کر کے لاش کو جلا دیا گیا ہے۔ پولس اس معاملہ کی تحقیقات میں مصروف ہو گئی ہے۔

معاملہ اناؤ ضلع کے اووہا تھانے علاقہ کا ہے۔آج یعنی جمعرات کی صبح پولس کو اطلاع ملی کہ بھلا فارم روڈ کے جنگلی کھیڑا کے نزدیک جنگل میں جلی ہوئی حالت میں ایک لاش برآمد ہوئی ہے۔ فوری طور پر پولس موقع واردات پر پہنچی اور اس نے پایا کہ خاتون کی لاش کو جلانے کے بعد وہاں پھینک دیا گیا ہے۔

جیسے ہی اس معاملہ کی معلومات ضلع کے اعلیٰ پولس افسران تک پہنچی وہ جائے وقوعہ پر پہنچ گئے۔ پولس نے لاش کو اپنے قبضہ میں لے کر پوسٹ مارٹم کے لئے اسپتال بھیج دیا ہے۔ موقع پر سی او سمیت دیگر افسران موجود ہیں ۔

خدشہ ظاہر کیا جا رہا ہےکہ عصمت دری کرنے کے بعد خاتون کوجلاکر قتل کیا گیا ہے یا پھر لاش کو جلا یا گیا ہے اس بات کا پتہ تو پوسٹ مارٹم رپورٹ سے ہی چلے گا۔ خاتون کی شناخت نہیں ہو پائی جو کہ پولس کے لئے ایک چیلنج ثابت ہو رہا ۔ فی الحال پولس پورے علاقے میں سراغ جمع کرنے کی کوشش کر رہی ہے۔