آئی پی ایل سٹہ بازی معاملہ میں ارباز خان کو سمن

آئی پی ایل سے جڑے سٹہ بازی کے ایک معاملہ میں سلمان خان کے بھائی اور بالی وڈ کے اداکار ارباز خان کا نام سامنے آیا ہے۔ میڈیا رپورٹس کے مطابق انڈر ورلڈ ڈان داؤد ابراہیم کے قریبی سٹہ باز سونو جالان نے پولس پوچھ تاچھ کے دوران ارباز خان کا نام لیا ہے جس کے بعد ممبئی کی کرائم برانچ نے ارباز خان کو سمن بھیجا ہے۔ ممبئی کے اینٹی کرپشن سیل نے ارباز سے پولس اسٹیشن میں آکر اپنا بیان درج کرانے کے لئے کہا ہے۔

واضح رہے کہ کچھ روز قبل اینٹی کرپشن سیل نے آئی پی ایل میچ کے دوران سٹہ بازی کے معاملہ میں تین سٹہ بازوں کو گرفتار کیا تھا۔ ان سے پوچھ تاچھ کے دوران سٹہ باز سونو جالان کا نام سامنے آیا تھا جس کے بعد سونو جالان کو گرفتار کیا گیا تھا۔ سونو جالان نے پوچھ تاچھ کے دوران بتایا کہ بالی وڈ کی کئی معروف شخصیات الگ الگ ناموں سے سٹہ بازی میں پیسہ لگاتی ہیں۔ اس میں ارباز خان کا نام بھی سامنے آیا۔ نام سامنے آنے کے بعد پولس نے پوچھ تاچھ کے لئے ارباز کو سمن بھیجا ہے۔ واضح رہے سوشل میڈیا پر ارباز خان کی کئی تصاویر سونو جالان کے ساتھ سامنے آئی ہیں۔

ذرائع کے مطابق سونو جالان نے بالی وڈ کی کئی معروف شخصیات کا پیسہ آئی پی ایل میں الگ الگ ناموں سے لگایا تھا اور کافی منافع بھی کمایا تھا۔ بالی ووڈ کی کچھ شخصیات کو سونو بلیک میل کر ان کا پردہ فاش کرنے کی دھمکی بھی دے رہا تھا۔ ذرائع کے مطابق ارباز نے بھی سونو کے ذریعہ سٹہ بازی میں پیسہ لگایا تھا اور کروڑو روپے ہار گئے تھے اب سونو ان پیسوں کی وصولی کے لئے ارباز کو مستقل بلیک میل کر رہا تھا۔

پولس کے مطابق سٹہ باز سونو جالان داؤد گروہ کا قریبی ہے اور وہ پاکستان و سعودی عرب میں رہ کر کرکٹ میں سٹہ بازی کرتا ہے۔ پولس نے اسے کلیان کورٹ سےا س وقت گرفتار کیا تھا جب وہ اسی کیس کے سلسلے میں ایک ملزم سے ملنے آیا تھا۔ ذرائع کے مطابق سونو نے ملاڈ میں دو کرکٹ میچ فکس کئے تھے۔ بتایا جاتا ہے کہ سونو جالان کا سٹہ بازی سے سالانہ ٹرن اوور سو کروڑ کا ہے اور اس کے سٹے بازی کا جال کئی ممالک میں پھیلا ہوا ہے۔