’آپ کو جتنا پریشان کرنا ہے کر لو، ہم نہیں رکیں گے‘، پارٹی کارکنان کے خلاف پولیس کارروائی سے کانگریس ناراض

’’ہردیپ پوری نے 9 فروری کو کہا تھا کہ ملک میں ایل پی جی کی کوئی کمی نہیں ہے، گودام بھرے ہوئے ہیں۔ لیکن پورے ملک سے خبریں آ رہی ہیں کہ ہر جگہ ایل پی جی سلنڈر کی کمی ہو چکی ہے۔ پورا ملک اس قلت کی زد میں آ چکا ہے۔ جس دن ایل پی جی سلنڈر کی قیمت بڑھی تھی، تبھی ہم ہردیپ پوری سے ملنے گئے تھے، لیکن انھوں نے ملنے سے انکار کر دیا۔ لیکن ہم رکے نہیں، ہم نے آواز کو بلند کیا۔ نتیجہ یہ رہا کہ عوام کی آواز اٹھانے کے لیے ہمارے اوپر ایف آئی آر درج کر دی گئی۔‘‘ یہ بیان آج مہیلا کانگریس کی قومی صدر الکا لامبا نے ایک پریس کانفرنس میں دیا۔ انھوں نے میڈیا سے کہا کہ وزیر اعظم مودی ’کمپرومائزڈ‘ ہو چکے ہیں، اسی لیے ملک میں ایسے حالات پیدا ہوئے ہیں۔