ہنر ہاٹ میں خواتین کاریگروں کو شاندار موقع ملا: نقوی

اقلیتی امور کے مرکزی وزیر مختار عباس نقوی نے کہا کہ ہنر ہاٹ سے نو لاکھ 50 ہزار سے زیادہ دست کاروں اور کاریگروں کو روزگار کے مواقع فراہم کیے گئے ہیں، جن میں سے 50 فیصد سے زیادہ خواتین کاریگر ہیں۔ مسٹر نقوی نے 40ویں 'ہنر ہاٹ' میں اپنے دورہ کے دوران ممبئی کے ایم ایم آر ڈی اے گراؤنڈ میں نامہ نگاروں کو بتایا کہ اس کا انعقاد16 اپریل سے 27 اپریل تک کیا گیا ۔ممبئی میں چل رہے اس 'ہنر ہاٹ' میں اب تک تقریباً 20 لاکھ لوگ آ چکے ہیں۔ اندازہ کے مطابق 27 اپریل کو ہنر ہاٹ کے اختتام تک یہ تعداد 25 لاکھ کو عبور کر جائے گی۔

نقوی نے کہا کہ تعداد کے علاوہ ملک کے کونے کونے سے آئے دستکار اور کاریگر اپنی دیسی مصنوعات کی زبردست فروخت سے بہت پرجوش ہیں۔ انہیں بڑے پیمانے پر آرڈر بھی مل رہے ہیں۔ ممبئی ہنر ہاٹ میں ملک کی 31 سے زیادہ ریاستوں اور مرکز کے زیر انتظام علاقوں سے تقریباً 1000 کاریگروں، دست کاروں نے حصہ لیا۔

انہوں نے کہا کہ ممبئی اور ملحقہ علاقوں سے لوگ بڑی تعداد میں دستکاروں، کاریگروں اور فنکاروں کی حوصلہ افزائی کے لیے آئے۔ ملک کے مختلف علاقوں سے روایتی پکوانوں سے لطف اندوز ہوئے۔ اس کے ساتھ سرکس، لیزر لائٹ شو اور ملک کے نامور فنکاروں کے بہترین گانوں اور موسیقی کے پروگرام یہاں آنے والوں کی توجہ کا مرکز رہے۔