ووٹ ادھیکار یاترا کا پانچواں دن: ’بی جے پی اور الیکشن کمیشن عوام کا ووٹ چھین رہے ہیں، بہار میں من مانی نہیں چلے گی‘

پٹنہ: بہار میں کانگریس کی ’ووٹر ادھیکار یاترا‘ آج اپنے پانچویں دن میں داخل ہوئی، جس نے ریاست کی سیاست میں نئی حرارت پیدا کر دی ہے۔ اس یاترا کا مقصد عوام کو ان کے بنیادی جمہوری حق یعنی ووٹ کے تحفظ کے لیے بیدار کرنا ہے۔

یاترا کا آغاز صبح 9 بجے شیخ پورہ سے ہوا، جہاں شرکا نے تین موہانی درگا مندر سے مارچ شروع کیا۔ قافلہ پٹیل چوک سے آگے بڑھتے ہوئے چیواڑا چوک اور سکندرا کے راستے بس اسٹینڈ، لکھی سرائے پہنچا، جہاں آرام کا وقفہ رکھا گیا۔ دوپہر کے بعد شام 4 بجے یاترا کا دوسرا مرحلہ پٹرول پمپ بازار کمیٹی سے شروع ہوگا۔ اس کے بعد منگیر کے ہیمجا پور، جمال پور اسمبلی حلقے میں عوامی جلسہ سے خطاب کیا جائے گا۔ یاترا کا اختتام اور شب قیام صفی آباد (منگیر) میں ٹاٹا موٹرز کے سامنے ہوگا۔

یاترا کے ساتھ کانگریس نے ایکس پر لکھا، ’’بہار کی عوام ووٹ چوری کی سازش کو سمجھ چکی ہے۔ آج ہر ووٹر اپنے حق کے تحفظ کے لیے ہمارے ساتھ کھڑا ہے۔ جمہوریت کی حفاظت کے لیے یہ یاترا جاری ہے۔‘‘ مزید کہا گیا، ’’کروڑوں امیدوں کی مشعل لیے ہم یہ عہد کرتے ہیں کہ عوام کا حق کسی کو چھیننے نہیں دیں گے۔‘‘

بہار پردیش کانگریس صدر راجیش رام نے اپنے بیان میں کہا، ’’بابا صاحب نے آئین میں ہر شہری کو ووٹ کا حق دیا تھا لیکن بی جے پی اور الیکشن کمیشن مل کر یہ حق چھین رہے ہیں۔ ایس آئی آر کے نام پر انتخابی فہرست سے غریبوں کے نام چن چن کر کاٹے جا رہے ہیں۔ ایسے حالات میں ہمیں متحد ہو کر ووٹ کے حق کی لڑائی لڑنی ہوگی۔‘‘

انہوں نے بہار کی عوام کا شکریہ ادا کرتے ہوئے کہا، ’’وہ ووٹ چوری کے خلاف اس مہم کا حصہ بن رہے ہیں اور اپنے حق کے لیے آواز بلند کر رہے ہیں۔‘‘

بہار کے سابق نائب وزیر اعلیٰ اور آر جے ڈی لیڈر تیجسوی یادو نے یاترا میں شامل عوام کو خراجِ تحسین پیش کرتے ہوئے کہا، ’’آپ نے جس طرح یاترا میں شامل ہو کر ہمارا حوصلہ بڑھایا ہے، اسی جذبے کے ساتھ ہم ان بے ایمانوں کو اقتدار سے بے دخل کریں گے اور غریب کا راج قائم کریں گے۔‘‘

انہوں نے مزید کہا کہ بہار کو ایسی حکومت چاہیے جو ’پڑھائی، دوائی، کمائی، سنوائی اور کارروائی‘ پر مبنی ہو۔ تیجسوی نے بی جے پی اور الیکشن کمیشن پر جمہوریت اور آئین کو ختم کرنے کا الزام لگاتے ہوئے کہا کہ ’یہ بہار ہے، یہاں ان کی من مانی نہیں چلے گی۔‘

پانچویں دن کی یاترا نے یہ واضح کر دیا کہ بہار کے عوام ووٹ کے حق کے تحفظ کے لیے بڑی تعداد میں کانگریس اور اتحادی جماعتوں کے ساتھ کھڑے ہیں۔ عوامی شمولیت اور لیڈران کے سخت بیانات نے اشارہ دیا کہ آنے والے دنوں میں یہ تحریک مزید تیز ہوگی اور ریاست کی سیاست میں ایک بڑا رخ اختیار کر سکتی ہے۔