اتر پردیش میں ووٹر لسٹ کی خصوصی نظرثانی کی تیاریاں تیز، مسودہ فہرست 17 نومبر کو ہوگی شائع

غازی آباد/لکھنؤ: اتر پردیش میں اسمبلی انتخابی فہرستوں کی خصوصی نظرثانی 2027 کی تیاریاں تیز کر دی گئی ہیں۔ ریاست کے چیف الیکشن آفیسر نو دیپ رِنوا نے غازی آباد میں اس سلسلے میں ایک جائزہ میٹنگ کی صدارت کرتے ہوئے متعلقہ افسران کو ہدایت دی کہ زیادہ سے زیادہ اہل شہریوں کے نام ووٹر لسٹ میں شامل کرنے کے لیے مؤثر اقدامات کیے جائیں۔ انہوں نے بتایا کہ انتخابی فہرست کا مسودہ 17 نومبر کو شائع کیا جائے گا۔

میٹنگ میں انتخابی فہرستوں کی نظرثانی، مسودہ فہرست کی اشاعت اور اہل شہریوں کو ووٹر کے طور پر رجسٹر کرنے کی حکمت عملی پر تفصیلی تبادلہ خیال کیا گیا۔ اس موقع پر رول آبزرور، ڈویژنل کمشنر، ضلع الیکشن افسر، ڈپٹی ضلع الیکشن افسر اور مختلف اسمبلی حلقوں کے الیکٹورل رجسٹریشن افسران سمیت دیگر متعلقہ حکام موجود تھے۔

چیف الیکشن آفیسر نے بتایا کہ مسودہ فہرست کی اشاعت کے بعد 17 نومبر سے 16 دسمبر 2026 تک دعوے اور اعتراضات وصول کیے جائیں گے۔ اس دوران اہل شہری اپنا نام ووٹر لسٹ میں شامل کرانے کے لیے فارم 6 جمع کر سکتے ہیں۔ کسی نام کی شمولیت پر اعتراض یا کسی نااہل شخص کا نام حذف کرانے کے لیے فارم 7 استعمال کیا جا سکے گا۔ جبکہ نام، پتے اور دیگر تفصیلات میں اصلاح، رہائش کی تبدیلی، ووٹر شناختی کارڈ (ای پی آئی سی) میں تبدیلی اور معذوری سے متعلق نشان دہی کے لیے فارم 8 جمع کیا جا سکے گا۔

موصول ہونے والے دعووں اور اعتراضات کا تصفیہ 28 دسمبر تک کیا جائے گا، جبکہ حتمی انتخابی فہرست 4 جنوری 2027 کو شائع ہوگی۔ نظرثانی کے عمل کے دوران 21 اور 22 نومبر کے علاوہ 28 اور 29 نومبر کو خصوصی مہم کے دن بھی منائے جائیں گے۔ ان دنوں بوتھ لیول افسران (بی ایل او) اپنے متعلقہ پولنگ مراکز پر موجود رہیں گے اور شہریوں سے دعوے اور اعتراضات وصول کریں گے۔

غازی آباد میں ووٹر رجسٹریشن کی صورت حال کا ذکر کرتے ہوئے نو دیپ رِنوا نے بتایا کہ ضلع کی موجودہ انتخابی فہرست میں 23 لاکھ سے زیادہ ووٹروں کے نام درج ہیں، تاہم اندازے کے مطابق تقریباً 10 لاکھ مزید اہل شہریوں کے نام فہرست میں شامل کیے جانے باقی ہیں۔ انہوں نے اس ہدف کو پورا کرنے کے لیے سرکاری محکموں، سماجی تنظیموں، رہائشی ویلفیئر ایسوسی ایشنز اور تعلیمی اداروں کے تعاون سے وسیع مہم چلانے کی ہدایت دی۔

انہوں نے بتایا کہ اتر پردیش میں 18 سال یا اس سے زیادہ عمر کے شہریوں کی تعداد تقریباً 16 سے 17 کروڑ ہے، جبکہ موجودہ ووٹر لسٹ میں تقریباً 13.56 کروڑ افراد کے نام درج ہیں۔ اس طرح اہل شہریوں کی رجسٹریشن کا تناسب تقریباً 84 فیصد ہے۔

مسودہ انتخابی فہرست چیف الیکشن آفیسر اتر پردیش اور ضلع الیکشن افسران کی ویب سائٹس، متعلقہ پولنگ مراکز اور الیکٹورل رجسٹریشن افسران کے دفاتر میں دستیاب ہوگی۔ اس کی نقول تسلیم شدہ سیاسی جماعتوں کو بھی فراہم کی جائیں گی۔ چیف الیکشن آفیسر نے تمام اہل شہریوں سے اپیل کی کہ وہ 17 نومبر کو شائع ہونے والی مسودہ فہرست میں اپنا اور اپنے اہل خانہ کا نام ضرور چیک کریں، تاکہ کسی اہل شہری کا نام ووٹر لسٹ میں شامل ہونے سے محروم نہ رہ جائے۔