ٹرانس جینڈر ایکٹ 2026: تمام ہائی کورٹس میں چل رہی عرضیوں پر سپریم کورٹ کی روک

سپریم کورٹ نے راجستھان، کرناٹک، کیرالہ اور دہلی ہائی کورٹس میں ’ٹرانس جینڈر پرسنز ترمیمی ایکٹ 2026‘ کو چیلنج کرنے والی رِٹ عرضیوں پر جاری کارروائی پر روک لگا دی ہے۔ یہ معاملہ ٹرانس جینڈر پرسنز ترمیمی قانون 2026 کو چیلنج کرنے سے متعلق ہے۔ یہاں مختلف ہائی کورٹس میں دائر درخواستوں کو دہلی ہائی کورٹ میں منتقل کرنے کا مطالبہ کرنے والی مرکزی حکومت کی عرضیوں پر سماعت ہو رہی تھی۔ سماعت کے دوران سالیسٹر جنرل تشار مہتا نے کہا کہ مرکز کے قانون کی آئینی حیثیت کو چیلنج کیا گیا ہے، جس پر عدالت غور کر رہی ہے۔

عدالت کے سامنے موجود درخواست گزاروں میں سے ایک نے کہا کہ میری درخواست سب سے تفصیلی ہے، میں خود ایک کوالیفائیڈ ڈاکٹر ہوں۔ اس پر چیف جسٹس آف انڈیا سوریہ کانت نے کہا کہ ہمیں یقیناً آپ کی مدد کی ضرورت ہوگی۔ عرضی گزار نے کہا کہ بہتر ہوگا کہ تمام معاملات پر ایک ساتھ غور کیا جائے۔ چیف جسٹس نے کہا کہ یا تو ہم اسے کسی ایک ہائی کورٹ کو سونپ دیں گے، یا پھر الگ الگ رائے لینے کے بجائے ہم خود اس پر فیصلہ کریں گے۔

تشار مہتا نے کہا کہ ’نالسا‘ کا ایک فیصلہ موجود ہے، اس لیے براہ کرم نوٹس جاری کریں۔ میں معزز ججوں کو اس معاملے کو 3 ججوں کی بنچ کے سامنے پیش کرنے کے لیے راضی کر سکتا ہوں۔ ہائی کورٹس کے لیے اس فیصلے کے برعکس کوئی رائے قائم کرنا مشکل ہو سکتا ہے۔ وکیل نے کہا کہ ’نالسا‘ کے فیصلے کی بنیاد پر ایسا کچھ بھی نہیں ہے۔ یہ ترمیم نہ صرف آئین کے خلاف ہے، بلکہ اس کی کوئی طبی بنیاد بھی نہیں ہے۔

سپریم کورٹ کی بنچ نے دہلی ہائی کورٹ میں درخواست دائر کرنے والے ڈاکٹر چندریش جین کا موقف بھی کچھ دیر سنا۔ ڈاکٹر جین نے دلیل دی کہ 2016 کی ترمیم غیر آئینی ہے کیونکہ یہ 2014 کے ’نالسا‘ فیصلے کو کمزور کرتی ہے، جس میں صنف کی خود تشخیصی شناخت کو بنیادی حق تسلیم کیا گیا تھا۔ انہوں نے یہ بھی کہا کہ اس ترمیم کی کوئی طبی بنیاد نہیں ہے۔