یکساں سول کوڈ کے خلاف ترنمول کانگریس، بل کی ہر مرحلے پر مخالفت کریں گے: سوگت رائے

کولکاتا: ترنمول کانگریس کے رکن پارلیمنٹ سوگت رائے نے کہا ہے کہ ان کی جماعت یکساں سول کوڈ (یو سی سی) کے مجوزہ قانون کی سخت مخالف ہے اور اگر یہ بل آگے بڑھایا جاتا ہے تو اس کی ہر مرحلے پر مخالفت کی جائے گی۔ انہوں نے واضح کیا کہ ترنمول کانگریس کا موقف ابتدا سے ہی اس معاملے پر یکساں رہا ہے اور پارٹی مستقبل میں بھی اس سے پیچھے نہیں ہٹے گی۔

آئی این ایس کی رپورٹ کے مطابق سوگت رائے نے کہ ترنمول کانگریس یو سی سی کے خلاف ہے۔ ان کے مطابق انہیں اطلاع ملی ہے کہ مغربی بنگال حکومت اس معاملے پر ایک کمیٹی تشکیل دینے جا رہی ہے، جس میں سپریم کورٹ کے ایک ریٹائرڈ چیف جسٹس کو شامل کیا جائے گا۔ انہوں نے کہا کہ کمیٹی کی تشکیل کے بعد اس کی سفارشات اور آئندہ پیش رفت پر نظر رکھی جائے گی، تاہم پارٹی کا بنیادی موقف تبدیل نہیں ہوگا۔

انہوں نے ایک بار پھر زور دیتے ہوئے کہا کہ ترنمول کانگریس اس بل کی مخالفت کرتی ہے اور اگر اسے نافذ کرنے کی کوشش کی گئی تو پارٹی ہر مناسب جمہوری اور سیاسی سطح پر اس کے خلاف آواز بلند کرے گی۔

الیکشن کمیشن کی جانب سے ممتا بنرجی اور باغی رہنما رتبرت بنرجی سے متعلق پیشرفت پر سوال کے جواب میں سوگت رائے نے کہا کہ انہیں اس معاملے کی مکمل معلومات حاصل نہیں ہیں۔ ان کے مطابق انہیں صرف اتنا معلوم ہے کہ رتبرت بنرجی الیکشن کمیشن کے دفتر گئے تھے، جبکہ اس معاملے پر ترنمول کانگریس کی جانب سے باضابطہ جواب دیا جائے گا۔

مغربی بنگال اسمبلی کے نو منتخب ارکان کے لیے منعقد کیے جانے والے تربیتی پروگرام پر اظہار خیال کرتے ہوئے سوگت رائے نے کہا کہ بھارتیہ جنتا پارٹی کے متعدد ارکان پہلی مرتبہ اسمبلی پہنچے ہیں، اس لیے انہیں پارلیمانی طریقۂ کار اور قانون سازی کے اصولوں سے واقف ہونا ضروری ہے۔ ان کے بقول ایسے تربیتی پروگرام کا مقصد نئے ارکان کو ایوان کی کارروائی، قواعد اور ذمہ داریوں سے آگاہ کرنا ہے۔

انہوں نے مزید کہا کہ موجودہ اسمبلی کے اسپیکر بھی نئی ذمہ داری سنبھال رہے ہیں، اس لیے نئے ارکان کے لیے تربیت فائدہ مند ثابت ہوگی اور اس سے انہیں اسمبلی کی کارروائی کو بہتر انداز میں سمجھنے میں مدد ملے گی۔

ممتا بنرجی اور جیا بچن کی ملاقات کے بارے میں سوگت رائے نے کہا کہ دونوں رہنماؤں کے درمیان خوشگوار تعلقات ہیں۔ انہوں نے کہا کہ جیا بچن سماج وادی پارٹی کی راجیہ سبھا رکن ہیں اور سماج وادی پارٹی اور ترنمول کانگریس کے تعلقات بھی دوستانہ نوعیت کے ہیں۔

ترنمول کانگریس کی 21 جولائی کو مجوزہ ریلی کے بارے میں انہوں نے کہا کہ پارٹی کی خواہش ہے کہ اجتماع دھرم تلہ میں منعقد کیا جائے، تاہم ابھی تک حتمی منظوری حاصل نہیں ہوئی ہے۔ ان کے مطابق ریلی کے مقام کے بارے میں آخری فیصلہ وزیر اعلیٰ ممتا بنرجی کریں گی۔