مرکز نے تقریباً تمام نظریاتی مقاصد حاصل کر لیے، حکومت آگے بھی اسی راہ پر چلتی رہے گی: امت شاہ

’’مرکزی حکومت نے تقریباً تمام نظریاتی مقاصد، بشمول آرٹیکل 370 کی منسوخی، حاصل کر لی ہے۔ حکومت اپنی تیسری مدت کار میں بھی اسی راہ پر چلتی رہے گی۔‘‘ یہ بیان مرکزی وزیر داخلہ امت شاہ نے 23 جنوری کو آر ایس ایس سے منسلک تنظیم ’ہندو اسپریچوئل اینڈ سروس فاؤنڈیشن‘ (ہندو روحانی و خدمت فاؤنڈیشن) کی جانب سے منعقد ’ہندو اسپیرچوئل اینڈ سروس فیئر‘ میلہ کا افتتاح کرتے ہوئے دیا۔

امت شاہ نے اپنی تقریر کے دوران واضح کر دیا کہ حکومت کا ارادہ اپنا راستہ تبدیل کرنے کا بالکل بھی نہیں ہے، بلکہ جن نظریات کو لے کر مودی حکومت بنی ہے، ان کو مدنظر رکھتے ہوئے ہی قدم اٹھائے جائیں گے۔ انھوں نے کہا کہ مودی حکومت نے گزشتہ ایک دہائی کے دوران کئی نظریاتی اہداف کو حاصل کیا ہے، مثلاً آرٹیکل 370 کی منسوخی، ایودھیا میں رام مندر کی تعمیر، تین طلاق کا خاتمہ وغیرہ۔

گجرات یونیورسٹی کے احاطہ میں منعقد اس تقریب کے دوران امت شاہ نے تذکرہ کیا کہ ’’ایک وقت تھا جب ہندو اپنے ہی ملک میں اپنی شناخت ظاہر کرنے میں جھجک محسوس کرتے تھے۔ حالانکہ گزشتہ 10 سالوں میں ہندوؤں کے اندر ڈرامائی تبدیلی دیکھنے کو مل رہی ہے۔‘‘ آرٹیکل 370 کی منسوخی، تین طلاق کا خاتمہ، رام مندر کی تعمیر اور یو سی سی نافذ کرنے کے لیے اٹھائے گئے اقدام کو مودی حکومت کی حصولیابی قرار دیتے ہوئے امت شاہ نے کہا کہ ’’اب ہمارے نظریے کے ساتھ جڑے تقریباً تمام کام پورے ہو چکے ہیں۔‘‘

قابل ذکر ہے کہ امت شاہ نے جن کاموں کو مودی حکومت کی حصولیابی کے طور پر شمار کرایا، وہ سبھی ایک خاص طبقہ کے خلاف مانے جاتے ہیں۔ یو سی سی پورے ملک میں نافذ کرنے کا ارادہ بھی امت شاہ کئی بار ظاہر کر چکے ہیں۔ بی جے پی حکمراں ریاست اتراکھنڈ میں یو سی سی 27 جنوری کو نافذ کرنے کی تیاری بھی ہو چکی ہے۔ امت شاہ نے راجیہ سبھا میں بھی یہ جانکاری دی تھی کہ آنے والے دنوں میں تمام ریاستوں میں یو سی سی نافذ کیا جائے گا۔

بہرحال، آر ایس ایس سے منسلک ادارہ کی تقریب سے خطاب کرتے ہوئے امت شاہ نے کہا کہ موجودہ حکومت نے ایک دہائی میں کئی ایسے اہم کام مکمل کیے جنھیں سابقہ حکومتوں نے 70 سالوں تک نظر انداز کیا۔ امت شاہ نے فخریہ انداز میں کہا کہ ’’ایک وقت تھا جب ’میں ہندو ہوں‘ کہنے میں تکلیف ہوتی تھی۔ اب لوگ اندر سے کچھ ایسا محسوس کرتے ہیں کہ بے ساختہ خود کو ہندو کہتے ہیں۔ آج ہمارے تقریباً تمام نظریاتی منصوبے حاصل ہو چکے ہیں۔‘‘

آر ایس ایس کے تاریخی تناظر کو دیکھتے ہوئے امت شاہ کے ذریعہ دیے گئے بیانات کے مضمرات کو سمجھنے کی ضرورت ہے۔ دراصل آر ایس ایس ایک خاص ہندو قوم پرست نظریہ کو فروغ دیتا رہا ہے۔ اس نے اقلیتی برادری کے خلاف نفرت انگیز تقریر کو ہمیشہ حوصلہ بخشا ہے، یہی وجہ ہے کہ اس تنظیم اور اس کے نظریات ماننے والوں کے خلاف آواز بھی اٹھتی رہی ہے۔