بہار حکومت خواتین کو تحفظ دینے میں ناکام: تیجسوی یادو

پٹنہ: راشٹریہ جنتا دل کے قومی کارگزار صدر اور بہار اسمبلی میں قائد حزب اختلاف تیجسوی یادو نے بہار حکومت پر خواتین کی حفاظت میں ناکامی کا الزام لگاتے ہوئے کہا ہے کہ ریاست میں خواتین کے خلاف جرائم میں مسلسل اضافہ ہو رہا ہے اور حکومت مجرموں پر قابو پانے میں ناکام ثابت ہو رہی ہے۔

تیجسوی یادو نے منگل کو پٹنہ میں پریس کانفرنس کے دوران وزیر اعلیٰ سمراٹ چودھری کی حکومت کو نشانہ بناتے ہوئے کہا کہ اقتدار کے تحفظ میں پلنے والے جرائم پیشہ عناصر اب ریاست کی ماؤں، بہنوں اور بیٹیوں کے لیے خوف کی علامت بن گئے ہیں۔ انہوں نے کہا کہ نئی حکومت کے قیام کے بعد خواتین کے خلاف جرائم کے واقعات میں تیزی دیکھی جا رہی ہے، جس سے عام خواتین میں خوف اور عدم تحفظ کا ماحول پیدا ہو گیا ہے۔

انہوں نے ریاست میں پیش آئے مختلف جرائم کا حوالہ دیتے ہوئے کہا کہ وزیر اعلیٰ کے پاس محکمہ داخلہ ہونے کے باوجود مجرموں میں قانون کا کوئی خوف دکھائی نہیں دیتا۔ ان کا کہنا تھا کہ حکومت صرف دعوے کر رہی ہے، جبکہ زمینی حقیقت اس کے بالکل برعکس ہے۔ تیجسوی یادو نے کہا کہ حکومت کو بنے ابھی ایک ماہ ہی ہوا ہے، لیکن اس مختصر مدت میں بھی خواتین کے خلاف جرائم کے متعدد واقعات سامنے آ چکے ہیں۔

انہوں نے بہار کی سیاسی صورتحال پر بھی تبصرہ کرتے ہوئے کہا کہ چھ ماہ کے اندر ریاست میں دو مرتبہ وزیر اعلیٰ تبدیل کیے گئے۔ عوام کے منتخب وزیر اعلیٰ کو ہٹا کر ایک “منتخب کردہ وزیر اعلیٰ” کو اقتدار دیا گیا، جس سے جمہوری اقدار کمزور ہوئی ہیں۔

تیجسوی یادو نے خواتین کو بااختیار بنانے کے حکومتی دعووں پر سوال اٹھاتے ہوئے کہا کہ بہار کی تقریباً 65 فیصد خواتین آج بھی خون کی کمی جیسی سنگین صحت مشکلات کا سامنا کر رہی ہیں۔ انہوں نے کہا کہ اگر خواتین کی صحت، تحفظ اور عزت محفوظ نہیں تو پھر حکومت کے تمام دعوے بے معنی ہیں۔

انہوں نے پولیس انکاؤنٹر کے معاملات پر بھی سوال اٹھاتے ہوئے الزام لگایا کہ بہار میں ذات پات دیکھ کر کارروائیاں کی جا رہی ہیں۔ انہوں نے طنزیہ انداز میں کہا کہ حکومت پہلے متاثرہ خاتون کی ذات دیکھتی ہے اور پھر ملزم کی ذات، اس کے بعد کارروائی کا فیصلہ کیا جاتا ہے۔

آر جے ڈی لیڈر نے بالیکا گرہ معاملے کا ذکر کرتے ہوئے کہا کہ اس کیس کے اصل ملزموں کے خلاف سخت کارروائی کیوں نہیں کی جا رہی۔ انہوں نے بھارتیہ جنتا پارٹی اور جنتا دل یونائیٹڈ پر خواتین کو انتخابی وعدوں کے نام پر گمراہ کرنے کا الزام بھی لگایا۔ تیجسوی یادو نے کہا کہ خواتین سے دو لاکھ روپے دینے کا وعدہ کیا گیا تھا، لیکن اب تک یہ وعدہ پورا نہیں کیا گیا۔