تمل ناڈو اسمبلی انتخابات: راہل گاندھی کا وجے کو فون، ٹی وی کے کی شاندار کارکردگی پر مبارکباد، نوجوانوں کی آواز کو فیصلہ کن قرار دیا

کانگریس لیڈر راہل گاندھی نے تمل ناڈو کے معروف اداکار و سیاست دان تھلاپتی وجے سے بات کر کے ان کی پارٹی ٹی وی کے کی شاندار کارکردگی پر مبارکباد دی۔

راہل گاندھی نے کہا کہ یہ مینڈیٹ نوجوانوں کی ابھرتی ہوئی آواز کی عکاسی کرتا ہے، جسے نظر انداز نہیں کیا جا سکتا۔ انہوں نے تمل ناڈو اور پڈوچیری میں کانگریس کارکنوں کا بھی شکریہ ادا کیا اور یقین دہانی کرائی کہ کانگریس پارٹی عوام کی خدمت اور ان کے حقوق کے تحفظ کے لیے اپنا کردار جاری رکھے گی۔

واضح رہے کہ تمل ناڈو میں تھلاپتی وجے کی پارٹی ٹی وی کے نے 71 سیٹوں پر جیت کے ساتھ 106 سیٹوں پر سبقت حاصل کر لی ہے۔ جبکہ برسراقتدار اور وزیر اعلیٰ ایم کے اسٹالن کی پارٹی ڈی ایم کے محض 59 سیٹوں تک محدود نظر آ رہی ہے۔ غورطلب ہے کہ 234 سیٹوں کی تمل ناڈو اسمبلی میں اکثریت کے لیے 117 سیٹیں درکار ہیں۔

تمل ناڈو میں نہ ہی ڈی ایم کے اتحاد کو اکثریت حاصل ہوتی دکھائی دے رہی ہے، نہ ہی اے ڈی ایم کے اتحاد کو۔ دونوں ہی حکومت سازی کے لیے ضروری 118 سیٹوں سے بہت پیچھے ہیں۔ ٹی وی کے اس معاملہ میں سب سے آگے ہے، جو تازہ ترین خبروں کے مطابق 109 سیٹیں حاصل کرتی ہوئی دکھائی دے رہی ہے۔ کچھ سیٹوں پر مقابلہ بہت قریبی ہے، یعنی ٹی وی کے کی سیٹیں مزید بڑھ سکتی ہیں۔ ڈی ایم کے اتحاد کو فی الحال 72 اور اے ڈی ایم کے اتحاد کو 53 سیٹیں ملتی دکھائی دے رہی ہے۔ بقیہ سیٹوں پر دیگر پارٹیوں کے امیدوار آگے چل رہے ہیں۔ غور کرنے والی بات یہ ہے کہ مقامی کانگریس لیڈران نے ٹی وی کے کو حمایت دینے کا واضح اشارہ دے دیا ہے۔ ایسے میں ٹی وی کے بہ آسانی حکومت سازی کرتی ہوئی دکھائی دے رہی ہے۔

اس درمیان وجئے کی پارٹی ٹی وی کے سے تعلق رکھنے والے ایک لیڈر ادھو ارجن نے میڈیا سے کہا کہ ’’ہم اس فتح کو کرور حادثہ کے متاثرین کو وقف کرتے ہیں۔‘‘ انھوں نے مزید کہا کہ ’’ووٹ کے بدلے نقدی دینے کی رسم ختم ہو گئی ہے۔ تمل ناڈو کی عوام نے اپنا فیصلہ سنا دیا ہے۔‘‘

رجحانات میں وجئے کی پارٹی ٹی وی کے مستقل ’نمبر 1‘ بنی ہوئی ہے۔ حالانکہ ریاست میں سہ رخی مقابلہ کے سبب ڈی ایم کے اتحاد اور اے ڈی ایم کے اتحاد میں دوسرے مقام کے لیے زبردست ٹکر دیکھنے کو مل رہی ہے۔ کافی دیر دوسرے مقام پر رہنے کے بعد اے ڈی ایم کے اتحاد تیسرے مقام پر چلی گئی ہے۔ یعنی ڈی ایم کے اتحاد نے دوسرے مقام پر قبضہ کر لیا ہے۔ تازہ ترین خبروں کے مطابق ٹی وی کے 5 سیٹوں پر جیت حاصل کر چکی ہے، جبکہ 102 سیٹوں پر آگے چل رہی ہے۔ ڈی ایم کے اتحاد نے 2 سیٹوں پر جیت حاصل کی ہے اور 65 سیٹوں پر آگے چل رہی ہے۔ اے ڈی ایم کے اتحاد کو فی الحال کسی بھی سیٹ پر کامیابی نہیں ملی ہے، حالانکہ 60 سیٹوں پر سبقت بنائے ہوئی ہے۔

تمل ناڈو کانگریس کمیٹی کے کچھ لیڈران نے میڈیا سے بات کرتے ہوئے کہا ہے کہ اکثریت نہ ملنے کی صورت میں پارٹی ’تملگا ویتری کژگم‘ (ٹی وی کے) کی حمایت کر سکتی ہے۔ حالانکہ ان کا یہ بھی کہنا ہے کہ اس بارے میں حتمی فیصلہ ریاستی یونٹ سے ملی جانکاری کے بعد اعلیٰ کمان کے ذریعہ لیا جائے گا۔

دلچسپ بات یہ ہے کہ اے آئی اے ڈی ایم کے نے بھی اشارہ دیا ہے کہ وہ ٹی وی کے کو حمایت دے سکتی ہے۔ پارٹی ترجمان اپسرا ریڈی نے ایک میڈیا ادارہ سے بات کرتے ہوئے کہا کہ ’’آپ جانتے ہیں، اس طرح کے کسی بھی قدم کے لیے میں اصولی طور سے اپنا رخ بدل سکتی ہوں، لیکن حتمی فیصلہ پارٹی پر منحصر کرتا ہے۔ مجھے لگتا ہے کہ اگر مقصد ڈی ایم کے کو اتحاد سے باہر رکھنا ہے، تو اے آئی اے ڈی ایم کے اس پر غور کر سکتی ہے۔‘‘

تھلاپتی وجئے کی پارٹی ’ٹی وی کے‘ کے طوفان میں کئی سیاسی ہستیوں کی حالت خستہ دکھائی دے رہی ہے۔ وزیر اعلیٰ ایم کے اسٹالن کولاتھور اسمبلی سیٹ پر پیچھے چل رہے ہیں، اور ووٹوں کا فاصلہ 1200 سے زیادہ کا بتایا جا رہا ہے۔ میڈیا رپورٹس کے مطابق 2 راؤنڈ مکمل ہونے کے بعد اسٹالن کو ٹی وی کے امیدوار ایس وی بابو سے سخت مقابلہ مل رہا ہے۔ دوسری طرف ٹی وی کے چیف تھلاپتی وجئے پہلے دور کی ووٹنگ کے بعد تیروچیراپلی سیٹ پر 1649 ووٹوں سے آگے چل رہے ہیں۔ یہاں 44 راؤنڈ کی گنتی ہونی ہے۔

تمل ناڈو میں 216 سیٹوں کے رجحانات سامنے آ گئے ہیں اور وجئے کی پارٹی ’ٹی وی کے‘ نے رجحانات میں سنچری بھی لگا دی ہے۔ اس پارٹی کے 100 امیدوار اپنی اپنی سیٹوں پر سبقت بنائے ہوئے ہیں، جبکہ ڈی ایم کے اتحاد کے 47 امیدوار اور اے آئی اے ڈی ایم کے اتحاد کے 69 امیدواروں نے برتری بنا لی ہے۔

تمل ناڈو کی 234 رکنی اسمبلی میں حکومت سازی کے لیے جادوئی نمبر 118 ہے، اور اس نمبر کی طرف وجئے کی پارٹی ’ٹی وی کے‘ بہت تیزی کے ساتھ بڑھتی ہوئی دکھائی دے رہی ہے۔ اب تک جن 206 اسمبلی سیٹوں کے رجحانات سامنے آئے ہیں، ان میں 85 سیٹوں پر ٹی وی کے امیدوار نے سبقت بنا لی ہے۔ ڈی ایم کے اتحاد نے 56 اور اے آئی اے ڈی ایم کے اتحاد نے 65 سیٹوں پر برتری بنائی ہے۔

تمل ناڈو میں 234 اسمبلی سیٹوں میں سے اب تک 184 سیٹوں کے رجحانات سامنے آ گئے ہیں۔ وجئے کی پارٹی ’ٹی وی کے‘ نے سبھی کو حیران کرتے ہوئے ابتدائی رجحانات میں سبقت بنا لی ہے۔ اس کے امیدوار 82 سیٹوں پر آگے چل رہے ہیں، جبکہ کانگریس+ڈی ایم کے اتحاد 58 سیٹوں پر اور بی جے پی+اے آئی اے ڈی ایم کے اتحاد 44 سیٹوں پر آگے ہے۔ اس طرح ریاست میں مقابلہ پوری طرح سہ رخی دکھائی دے رہا ہے۔ گزرتے ہوئے وقت کے ساتھ یہ مقابلہ مزید دلچسپ ہوتا ہوا دکھائی دے رہا ہے۔

تمل ناڈو میں ووٹوں کی گنتی شروع ہو چکی ہے۔ ابتدائی رجحانات میں ڈی ایم کے نے سبقت حاصل کر لی ہے، جبکہ کولاتھور سیٹ سے وزیر اعلیٰ اسٹالن پیچھے ہو گئے ہیں۔ تمل ناڈو کی 234 اسمبلی سیٹوں پر ایک مرحلہ میں 23 اپریل کو ووٹنگ ہوئی تھی، جہاں ووٹرس میں زبردست جوش دکھائی دیا۔ ریاست میں 85 فیصد سے زیادہ ووٹنگ ہوئی تھی، اور سبھی کی نظریں تھلاپتی وجئے پر مرکوز ہیں، جو سیاست میں ’فلمی اسٹائل‘ میں انٹر مارنے کے لیے بے تاب ہیں۔ دیکھنے والی بات یہ ہے کہ وہ ’کنگ میکر‘ بن کر سامنے آتے ہیں، یا پھر مایوسی کا سامنا کرنا پڑتا ہے۔