مرکزی سکریٹریٹ لائبریری کی منتقلی پر سپریم کورٹ کا ازخود نوٹس، مرکز سے تفصیلی معلومات طلب

نئی دہلی: سپریم کورٹ نے نئی دہلی کے شاستری بھون میں واقع 135 سال پرانی مرکزی سکریٹریٹ لائبریری (سی ایس ایل) کو موجودہ مقام سے دوسری جگہ منتقل کرنے کے معاملے میں مرکزی حکومت سے تفصیلی معلومات طلب کی ہیں۔ عدالت نے مرکز کو تین ہفتوں کے اندر تفصیلی حلف نامہ داخل کرنے کی ہدایت دی ہے۔

جسٹس پی وی سنجے کمار اور جسٹس سنجیو سچدیوا کی بنچ نے پیر کو اس معاملے کی سماعت کرتے ہوئے مرکزی حکومت سے کہا کہ حلف نامے میں نئی جگہ سے متعلق مکمل تفصیلات فراہم کی جائیں۔ عدالت نے خاص طور پر لائبریری کے لیے مختص کی جانے والی جگہ کا لے آؤٹ پلان بھی پیش کرنے کو کہا ہے۔

سپریم کورٹ نے مرکز سے یہ واضح کرنے کو کہا ہے کہ نئے سینٹرل وسٹا منصوبے میں 135 سال پرانی اس لائبریری کے لیے کتنی جگہ مختص کی گئی ہے۔ عدالت نے یہ بھی جاننا چاہا کہ کیا مجوزہ جگہ لائبریری میں موجود تقریباً 8.5 لاکھ کتابوں کو رکھنے کے لیے کافی ہوگی۔

عدالت نے آر کے پورم میں ڈبوں میں رکھی ہوئی تقریباً 2 لاکھ اضافی کتابوں کے بارے میں بھی معلومات طلب کی ہیں۔ مرکز سے پوچھا گیا ہے کہ کیا نئی جگہ پر ان کتابوں کو رکھنے کے لیے بھی مناسب گنجائش موجود ہوگی۔ سماعت کے دوران مرکزی حکومت کی جانب سے ایڈیشنل سالیسٹر جنرل ایشوریہ بھاٹی نے عدالت کو بتایا کہ سینٹرل وسٹا منصوبے میں لائبریری کے لیے جگہ مختص کی گئی ہے۔ تاہم عدالت نے حکومت سے اس حوالے سے محض یقین دہانی کے بجائے مکمل تفصیلات حلف نامے کے ذریعے پیش کرنے کو کہا۔

سپریم کورٹ نے اس معاملے کا ازخود نوٹس لیا ہے۔ عدالت کی جانب سے لائبریری کی کتابوں کی تعداد اور نئی جگہ کی گنجائش سے متعلق تفصیلات طلب کیے جانے کو اس تاریخی ادارے کی منتقلی کے انتظامی اور تحفظ سے متعلق پہلوؤں کے تناظر میں اہم قرار دیا جا رہا ہے۔

مرکزی وزارت ثقافت کے تحت کام کرنے والی مرکزی سکریٹریٹ لائبریری کا قیام 1891 میں کلکتہ میں امپیریل سکریٹریٹ لائبریری کے نام سے ہوا تھا۔ بعد میں اسے دہلی منتقل کیا گیا۔

لائبریری کی ویب سائٹ کے مطابق، امپیریل سکریٹریٹ لائبریری کو 1912 میں دہلی منتقل کیا گیا اور اسے سول لائنز میں واقع اولڈ سکریٹریٹ بلڈنگ میں رکھا گیا۔ 1969 سے یہ لائبریری شاستری بھون میں قائم ہے۔ مرکزی سکریٹریٹ لائبریری کو ملک کی اہم سرکاری لائبریریوں میں شمار کیا جاتا ہے۔ یہ کولکاتا کی نیشنل لائبریری کے بعد دوسری سب سے بڑی مرکزی سرکاری لائبریری ہے۔