توہین رسالت اور مذہبی رہنماؤں کی شان گستاخی کے خلاف سخت کارروائی ضروری: ابو عاصم اعظمی

ممبئی: سماجوادی پارٹی نے منگل کے روز ممبئی میونسپل کارپوریشن کے سامنے ملک میں فرقہ پرستی، ہجومی تشدد اور مذہبی رہنماؤں کی شان میں گستاخی کے خلاف احتجاج کیا۔ اس دوران مظاہرین نے فرقہ پرستی ختم کرو اور مذہبی رہنماؤں کی شان میں گستاخی بند کرو جیسے نعرے بلند کئے۔

اس موقع پر بی ایم سی ہیڈ کوارٹر کے سیلفی پوائنٹ پر احتجاجی مظاہرہ سے خطاب کرتے ہوئے مہاراشٹر سماجوادی پارٹی لیڈر و رکن اسمبلی ابو عاصم اعظمی نے کہا کہ فرقہ پرستی اس ملک کے لئے خطرہ ہے اس لئے اس پر پابندی عائد کی جانی چاہئے۔ مذہبی رہنماؤں کے خلاف بدزبانی اور گستاخی کا سلسلہ بھی بند کیا جانا چاہیئے کیونکہ اگر یہ سلسلہ بند نہیں ہوا تو ملک میں فرقہ وارانہ تشدد کے ساتھ حالات خراب ہونے کا بھی خطرہ ہے۔

ابو عاصم نے کہا کہ آج ہندوؤں اور مسلمانوں میں نفرت پیدا کر کے اشتعال انگیز نعرے بازی کی جا رہی ہے دلی کے جنتر منتر میں جو ہنگامہ آرائی کی گئی وہ سب کے سامنے ہیں ہندوؤں اور مسلمانوں کو مشتعل کر کے اس ملک کی فرقہ وارانہ ہم آہنگی کو پارہ پارہ کر نے کی کوششیں جاری ہے اس لئے یہ تمام سلسلہ ختم ہونا چاہئے۔

ابوعاصم اعظمی نے مطالبہ کیا ہے کہ توہین رسالت سمیت مذہبی رہنماؤں کے خلاف نفرت انگیز بیانات اور بدزبانی و گستاخی کر نے والوں پر این ایس اے (قومی سلامتی قانون) عائد کیا جانا چاہئے ان پر دہشت گردی پھیلانے اور مکوکا کے تحت مقدمہ درج کیا جانا چاہئے۔

انہوں نے کہا کہ توہین رسالت کے معاملات میں ایف آئی آر درج تو ہو جاتی ہے لیکن آج تک اس میں کسی کو بھی سزا نہیں ہوئی ہے یہ کیس برسوں سرد خانے میں ڈال د یا جاتا ہے اس لئے ایسے معاملوں کو فاسٹ ٹریک کورٹ میں چلایا جائے اور فوری طور پر توہین رسالت کے مرتکبین کو سزا دے کر کیفر کردار تک پہنچایا جائے۔

انہوں نے کہا کہ ملک میں جس طرح سے حالات پیدا کئے جا رہے ہیں وہ فرقہ پرستوں کی سوچی سمجھی سازش کا نتیجہ ہے ہمارا ملک ایک سیکولر ملک ہے لیکن اس میں جو توہین رسالت کا سلسلہ شروع کیا گیا ہے وہ ملک میں بدامنی پیدا کرنے کی ایک سازش ہے اس سے مسلمانوں کے مذہبی جذبات ہی نہیں بلکہ انہیں تکلیف بھی پہنچتی ہے اور یہی وجہ ہے کہ مسلمان سڑکوں پر محمد مصطفی صلی اللہ علیہ وسلم کی عظمت کیلئے مر مٹنے کو تیار ہے اس لئے توہین رسالت کیخلاف سخت قانون مرتب کیا جائے تاکہ ملزمین کو سخت سے سخت سزا ہو۔