سونیا کا وزرائے اعلیٰ کو خط: ہر حاملہ اور دودھ پلانے والی ماں کے کھاتے میں 6000 روپے جمع کرائیں

نئی دہلی: کانگریس صدر سونیا گاندھی نے کانگریس حکومت والی ریاستوں کے وزرائے اعلی کو خط لکھ کر اس بات کو یقینی بنانے کے لئے کہا ہے کہ ریاست میں ہر حاملہ خاتون اور دودھ پلانے والی ماں کے بینک کھاتے میں نیشنل فوڈ سیکورٹی قانون کے تحت 6000 روپے جمع ہوں۔

سونیا گاندھی نے کہا کہ متحدہ ترقی پسند اتحاد حکومت (یو پی اے) نے 2013 میں اس ایکٹ کو منظور کیا تھا اور اس کے تحت حاملہ خواتین اور دودھ پلانے والی ماؤں کے کھاتے میں یہ رقم جمع کرنے کو کہا گیا تھا لیکن مودی سرکار نے اسے بدل کر ایسی خواتین کے ساتھ ناانصافی کی ہے۔

کانگریس صدر نے کہا کہ مودی حکومت نے تین سال تک اس منصوبہ کو نظر انداز کیا اور پھر 2017 میں وزیر اعظم ماتر وندنا یوجنا شروع کی جس کے تحت رقم کو چھ ہزار سے کم کر کے 5000 کر دیا گیا۔

انہوں نے کہا کہ اس اسکیم کا فائدہ صرف 22 فیصد خواتین کو ملا اور انہیں 2017-18 کی اس یوجنا کے تحت صرف ایک ہی قسط ملی ہے۔ انہوں نے کہا کہ کانگریس حکومت والی ریاستوں کا ہر وزیر اعلی ریاست کی سبھی حاملہ اور دودھ پلانے والی ماؤں کو 6000 روپے دینا یقینی بنائے۔