رام مندر نذرانہ چوری معاملے میں ایس آئی ٹی نے جانچ رپورٹ پیش کی، کئی راز سے اٹھے گا پردہ!

ایودھیا واقع رام مندر میں نذرانے اور عطیات کی رقم میں مبینہ ہیرا پھیری کی خبروں سے ریاست ہی نہیں ملک کی سیاست کا بھی درجہ حرارت بڑھا ہوا ہے۔ اپوزیشن لگاتار اس معاملے پر مرکز اور ریاستی حکومت پر سوال کھڑے کر رہا ہے۔ چو طرفہ مچے گھمسان کے دوران اتر پردیش کے وزیر اعلیٰ یوگی آدتیہ ناتھ نے معاملے کی جانچ کی ذمہ داری خصوصی تفتیشی ٹیم (ایس آئی ٹی) کو سونپی تھی۔ جانچ ایجنسی نے 23 جون کو اپنی ابتدائی جانچ رپورٹ یوپی حکومت کو سونپ دی ہے۔

اطلاعات کے مطابق 3 رکنی خصوصی تفتیشی ٹیم نے اپنی رپورٹ ایڈیشنل چیف سکریٹری (داخلہ) سنجے پرساد کو سونپ دی ہے۔ اس رپورٹ میں گزشتہ دنوں کی گئی تفتیش کی مکمل تفصیلات ہیں۔ مانا جا رہا ہے کہ اب کئی لوگوں کے نام سامنے آ سکتے ہیں اور کئی بڑے انکشاف ہو سکتے ہیں۔

لکھنؤ ڈویزن کے کمشنر اور ایس آئی ٹی سربراہ وجے وشواس پنت نے ٹیم کے دونوں ارکان کے ساتھ ایڈیشنل چیف سکریٹری (داخلہ) کو یہ ابتدائی رپورٹ سونپی ہے۔ پنت نے کہا کہ ہم نے رپورٹ سونپ دی ہے جو ایک ابتدائی رپوٹ ہے اور اس کی تفصیلات خفیہ رکھی گئی ہیں۔ انہوں نے کہا کہ فی الحال ہم کچھ بھی نہیں بتا سکتے ہیں، ہم نے اپنی جانچ کے نتائج انہیں بتا دیئے ہیں۔

دوسری طرف حکومت کی جانب سے واضح کیا گیا ہے کہ جانچ کی کارروائی ابھی جاری ہے یعنی یہ حتمی رپورٹ نہیں ہے اور اس معاملے کی جانچ ابھی آگے بھی چلتی رہے گی۔ ایودھیا معاملے کو لے کر ایس آئی ٹی نے گزشتہ دنوں مختلف پہلوؤں کی جانچ، لوگوں سے پوچھ گچھ اور دستاویزات کی تفتیش کی تھی۔ اب ابتدائی رپورٹ انتظامیہ کو سونپے جانے کے بعد اس حساس معاملے میں آگے کی کارروائی پر نظر رہے گی۔

ذرائع کے مطابق تقریباً 150 صفحات پر مشتمل رپورٹ میں تقریباً 150 لوگوں سے کی گئی پوچھ گچھ کی تفصیلات شامل ہیں۔ بتایا جا رہا ہے کہ ایس آئی ٹی نے ایف آئی آر درج کرنے اور مندر ٹرسٹ کی تشکیل نو کی سفارش کی ہے۔ ٹیم نے مندر کے چیف ایگزیکٹیو افسر(سی ای او) کے طور پر ایک  سینئر سرکاری افسر کی تقرری اور تفصیلی جانچ کے لئے ایس آئی ٹی کو اضافی وقت دینے کا بھی مشورہ دیا ہے۔ ذرائع نے بتایا کہ ایس آئی ٹی نے گزشتہ 5 سالوں میں مندر کو حاصل سبھی عطیات کا آڈٹ کرنے کی سفارش کی ہے۔

رپورٹ میں عطیات کی حفاظت کے سلسلے میں مستقبل میں ہونے والی بے ضابطگیوں کو روکنے کے لیے کئی اقدامات کی بھی تجویز کی گئی ہے جن میں ملازمین کی نئی بھرتی اور انتظامی نگرانی کو مضبوط بنانا شامل ہے۔ رپورٹ کے سفارشات پر حتمی فیصلہ اتر پردیش کے وزیر اعلیٰ یوگی آدتیہ ناتھ کریں گے۔