اسرائیل-ایران جنگ کی زد میں سِلک سٹی ’بھاگلپور‘، تقریباً 25 کروڑ روپے کے آرڈر منسوخ

ایران اور اسرائیل کے درمیان چھڑی شدید جنگ نے اب عالمی شکل اختیار کر لی ہے۔ امریکہ بھی پوری طاقت کے ساتھ اس جنگ میں کود پڑا ہے اور خلیجی خطے کے 10 سے زائد ممالک کسی نہ کسی صورت میں اس میں شامل ہو چکے ہیں۔ حالات ایسے بنتے جا رہے ہیں کہ ایسا لگتا ہے جیسی عالمی جنگ جیسی صورتحال پیدا ہو گئی ہو۔ اس کا اثر بہار کے ضلع بھاگلپور پر بھی پڑ رہا ہے، جہاں کی ریشم کی صنعت اس جنگ سے بری طرح متاثر ہوئی ہے۔

’سِلک سٹی‘ کے نام سے مشہور ضلع بھاگلپور ریشم کی صنعت کے لیے جانا جاتا ہے۔ یہاں کے کرگھوں کی آواز جو کبھی 18 گھنٹے تک گونجتی تھی، اب محض 5 سے 6 گھنٹے تک سمٹ کر رہ گئی ہے۔ بنکروں اور تاجروں کے تقریباً 20 سے 25 کروڑ روپے کے آرڈر منسوخ ہو چکے ہیں۔ بھاگلپور میں تیار ہونے والے کپڑے دہلی اور کولکاتہ جیسے بڑے شہروں کے ذریعے کئی ممالک میں برآمد کیے جاتے ہیں۔ مختلف ممالک سے کروڑوں کے آرڈر ملتے تھے، لیکن جنگ کے خدشات اور عدم استحکام نے تجارت کی رفتار پر بریک لگا دی ہے۔

بھاگلپور کا چمپا نگر علاقہ ریشم کی تجارت کا اہم مرکز مانا جاتا ہے۔ یہاں تقریباً ہر گھر میں کرگھا لگا ہے اور دن بھر ان کے چلنے کی آواز گونجتی رہتی ہے۔ اب حالات بدل چکے ہیں۔ 50 فیصد سے زیادہ کام بند پڑا ہے۔ بنکر ہیمنت کمار بتاتے ہیں کہ وہ کورونا دور کے بعد سے ہی مہنگائی کی مار جھیل رہے تھے، اوپر سے جنگ نے کمر توڑ دی ہے۔ تقریباً 50 سے 60 لاکھ روپے تک کے آرڈر منسوخ ہو چکے ہیں۔ دوسری جانب اگر پوری ریشم کی صنعت کی بات کریں تو تقریباً 20 سے 25 کروڑ روپے کے آرڈر منسوخ ہو گئے ہیں۔

بُنکر آلوک کمار کا کہنا ہے کہ ہر بڑی جنگ کا اثر سب سے پہلے بھاگلپور کی کپڑا صنعت پر پڑتا ہے، لیکن حکومت کی توجہ اس جانب نہیں ہے۔ مسلسل نقصانات کے باعث بنکروں کی حالت خستہ ہوتی جا رہی ہے۔ بین الاقوامی مارکیٹ میں عدم استحکام، ادائیگیوں میں تاخیر اور شپمنٹ رکنے سے تاجروں میں خوف کا ماحول ہے۔ ان کا کہنا ہے کہ بنکروں کے سامنے اب روزگار کا بحران گہرا ہوتا جا رہا ہے۔

قابل ذکر ہے کہ ایران-اسرائیل جنگ کے شعلے بھلے ہی ہزاروں کلومیٹر دور بھڑک رہے ہوں، لیکن اس کی تپش بھاگلپور کے کرگھوں کو جھلسا رہی ہے۔ اگر حالات جلد معمول پر نہ آئے تو ’سلک سٹی‘ کی پہچان اور ہزاروں خاندانوں کے روزگار پر سنگین بحران پیدا ہو سکتا ہے۔