یوپی: اکھلیش سے خفا شیوپال یادو کو اعظم خان کی رہائی کا انتظار، پھر ہوگا بڑا اعلان!

سماجوادی پارٹی سے الگ رہے رکن اسمبلی اور پرگتی شیل سماجوادی پارٹی لوہیا (پی ایس پی ایل) سربراہ شیوپال سنگھ یادو سماجوادی پارٹی کے ایک اور سینئر رکن اسمبلی محمد اعظم خان کے ساتھ نیا سیاسی محاذ بنانے کی تیاری کر رہے ہیں۔ شیوپال سنگھ یادو، اعظم خان کی جیل سے رہائی کا انتظار کر رہے ہیں۔ وہ اس مہینے کبھی بھی جیل سے باہر آ سکتے ہیں۔ اعظم خان کو ایک معاملے کو چھوڑ کر سبھی معاملوں میں پہلے ہی ضمانت مل چکی ہے۔

ذرائع کے مطابق جیل میں اعظم خان سے مل چکے شیوپال نے نئے سیاسی محاذ کے لیے پہلے ہی بلو پرنٹ تیار کر لیا ہے۔ اس میں ان لیڈروں کو شامل کیے جانے کا امکان ہے جو بی جے پی کے ساتھ ساتھ سماجوادی پارٹی سے بھی یکساں دوری بنائے رکھنا چاہتے ہیں۔ اعظم خان اور شیوپال یادو دونوں ہی سماجوادی پارٹی چیف اکھلیش یادو کے طریقہ کار سے بے حد خفا ہیں اور پارٹی میں خود کو چھوٹا محسوس کر رہے ہیں۔

پی ایس پی ایل کے ایک لیڈر، جو شیوپال کے کافی قریب ہیں، انھوں نے بتایا کہ شیوپال کا بی جے پی میں شامل ہونے کا کوئی منصوبہ نہیں ہے۔ وہ اپنی پارٹی کی از سر نو تشکیل کریں گے اور ایک نیا سیاسی محاذ بنانے کی سمت میں کام کریں گے۔ اس میں بھیم آرمی کے چندرشیکھر، جن ادھیکار پارٹی کے بابو سنگھ کشواہا اور راشٹریہ لوک دل کے لیڈر شامل ہو سکتے ہیں۔

ذرائع کا کہنا ہے کہ اکھلیش کی قیادت والی سماجوادی پارٹی کے کئی سینئر لیڈران جو اچھا محسوس نہیں کر رہے، وہ بھی شیوپال اور اعظم خان کے پیچھے جا سکتے ہیں۔ اس تعلق سے جب شیوپال یادو کے سامنے ایک رپورٹر نے سوال داغا تو انھوں نے مسکراتے ہوئے کہا ’’اعظم کو جیل سے باہر آنے دو اور پھر ہم آپ کو اپنے منصوبوں کے بارے میں بتائیں گے۔‘‘