شرمناک! وزیر اعظم کے ذریعہ آر ایس ایس کے لیے ڈاک ٹکٹ اور سکہ جاری کرنا تحریک آزادی کی بے حرمتی: وی ڈی ستیسن

وزیر اعظم نریندر مودی نے آج آر ایس ایس کے 100 سال مکمل ہونے پر خصوصی ڈاک ٹکٹ اور 100 روپے کا سکہ جاری کیا، جس کے خلاف اب آواز اٹھنے لگی ہے۔ اس عمل کے لیے اپوزیشن پارٹیاں پی ایم مودی کو ہدف تنقید بنا رہی ہیں۔ کیرالہ اسمبلی میں حزب اختلاف کے قائد اور کانگریس لیڈر وی ڈی ستیسن نے پی ایم مودی کے ذریعہ آر ایس ایس کی تعریف و توصیف کیے جانے کو ہندوستان کی تحریک آزاد کی بے حرمتی قرار دیا ہے۔

وی ڈی ستیسن نے سوشل میڈیا پلیٹ فارم ’ایکس‘ پر ایک پوسٹ جاری کر لکھا ہے کہ ’’شرمناک! وزیر اعظم کے ذریعہ آر ایس ایس کے لیے ڈاک ٹکٹ اور سکہ جاری کرنا ہماری تحریک آزادی کی بے حرمتی ہے۔‘‘ ساتھ ہی انھوں نے لکھا کہ ’’آر ایس ایس نے کبھی آزادی کی جنگ نہیں لڑی، اس نے تو دھوکہ کیا۔ ان کی تعریف و توصیف کرنا، یعنی تاریخ کو پھر سے لکھنا ہے، اور ہندوستان کی عوام اس بے حرمتی کو کبھی قبول نہیں کرے گی۔‘‘

قابل ذکر ہے کہ ستیسن سے قبل کیرالہ کے وزیر اعلیٰ پینارائی وجین نے بھی آر ایس ایس کی تعریف اور حوصلہ افزائی کے لیے پی ایم مودی کو تنقید کا نشانہ بنایا تھا۔ انھوں نے اپنے بیان میں کہا تھا کہ آر ایس ایس کے تعاون کا حوالہ دے کر خاص طور سے ڈیزائن کردہ ڈاک ٹکٹ اور 100 روپے کا سکہ جاری کرنا غلط ہے۔ انھوں نے پی ایم مودی کے اس فیصلے کو آئین کی بے حرمتی بتایا اور الزام عائد کیا کہ آر ایس ایس ایک تخریبی نظریات کو فروغ دیتا ہے، اور تحریک آزادی کے وقت بھی انھوں نے کسی بھی جنگ میں حصہ نہیں لیا۔

اپنی ایک تقریر کے دوران وزیر اعلیٰ وجین نے آر ایس ایس اور اسرائیل کے یہودیوں کے درمیان موازنہ بھی کیا۔ انھوں نے آر ایس ایس کو یہودیوں کا جڑواں بھائی بتایا۔ ساتھ ہی انھوں نے ڈونالڈ ٹرمپ کے بیانات پر وزیر اعظم کی خاموشی پر سوالیہ نشان لگایا۔ وزیر اعلیٰ نے مودی کو ڈونالڈ ٹرمپ کا مخلص خادم تک کہہ دیا۔ انھوں نے کہا کہ ٹرمپ انتظامیہ نے ہندوستانی شہریوں کو ہتھکڑی لگا کر وطن واپس بھیجا، ویزا فیس بڑھائی گئی اور ہندوستان پر ٹیرف بھی بڑھایا، لیکن مودی نے ٹرمپ کے خلاف کبھی کوئی رد عمل ظاہر نہیں کیا۔