آسام اسمبلی انتخاب سے عین قبل آسام گن پریشد کے سرکردہ لیڈر جینت کھاؤند سمیت کئی شخصیات کانگریس میں شامل

آسام اسمبلی انتخاب سے عین قبل ریاست میں کانگریس کو ایک اہم کامیابی اس وقت ملی جب کئی سرکردہ شخصیات نے پارٹی میں شمولیت اختیار کی۔ پیر کے روز ’آسام گن پریشد‘ کے سابق قومی مالیاتی سکریٹری جینت کھاؤند نے درجنوں لیڈران کے ساتھ کانگریس کا دامن تھام لیا۔ نئی دہلی واقع کانگریس دفتر میں انہیں پارٹی میں شامل کرایا گیا۔

اس موقع پر آسام کے انچارج جنرل سکریٹری جتیندر سنگھ الور، آسام کے لیے کانگریس کے سینئر مبصر اور کرناٹک کے نائب وزیر اعلیٰ ڈی کے شیوکمار، ریاستی صدر گورو گگوئی اور قومی سکریٹری منوج چوہان خاص طور پر موجود رہے۔ گورو گگوئی نے صحافیوں سے مخاطب ہوتے ہوئے کہا کہ جینت کھاؤند جیسے زمینی سطح سے جڑے لیڈر کا کانگریس میں آنا آسام میں چل رہی تبدیلی کی لہر کا اشارہ ہے۔ انہوں نے مزید کہا کہ آسام کی عوام کے دلوں میں وزیر اعلیٰ ہیمنت بسوا سرما کے خلاف غصہ ہے اور وہ ان کی منمانی سے تنگ آ چکی ہے۔

گورو گگوئی کے مطابق برسر اقتدار طبقہ میں موجود کئی لوگوں کو موجودہ قیادت میں گھٹن محسوس ہو رہی ہے۔ وزیر اعلیٰ فعال کارکنوں کو کنارے کر کے نااہل بنا رہے ہیں اور بدعنوان لوگوں کو فروغ دے رہے ہیں۔ گورو گگوئی نے ریاست میں کانگریس کی مضبوط پوزیشن کے بارے میں بھی میڈیا کے سامنے ذکر کیا اور کہا کہ اس بار عوام کا ساتھ پوری طرح کانگریس کو ملتا ہوا دکھائی دے رہا ہے۔

اس موقع پر کانگریس کے آسام انچارج جتیندر سنگھ نے سخت حملہ کرتے ہوئے کہا کہ بی جے پی کا واحد مقصد علاقائی شناخت اور علاقائی پارٹیوں کو ختم کرنا ہے۔ انہوں نے اڈیشہ اور بہار کی مثال دیتے ہوئے کہا کہ بی جے پی پہلے علاقائی پارٹیوں کے ساتھ اتحاد کرتی ہے اور بعد میں ان کا وجود مٹا دیتی ہے۔ انہوں نے مزید کہا کہ آسام میں بھی جب سے ہیمنت حکومت آئی ہے، تب سے آسام گن پریشد کو آہستہ آہستہ ختم کرنے کی سازش رچی جا رہی ہے۔ انہوں نے جینت کھاؤند کا کانگریس پارٹی میں خیرمقدم کرتے ہوئے کہا کہ وہ ہمیشہ اپنی اقدار پر قائم رہے ہیں۔ ان کے کانگریس میں آنے سے آسام کی ثقافت اور اقدار کو بچانے کی لڑائی کو تقویت ملے گی۔