سینئر صحافی نیلیما کا انتقال

نئی دہلی: خبررساں ایجنسی یو این آئی ہندی (یونیوارتا) کی سینئر صحافی کا آج دوپہر بعد یہاں انتقال ہوگیا۔ ان کی آخری رسومات آج شام میں ہی یہاں لودھی روڈ شمشان میں ادا کردی گئیں۔ اس موقع پر ان کے اہل خانہ اور کئی صحافی موجود تھے۔

محترمہ نیلیما طویل عرصے سے برین ٹیومر سے متاثر تھیں۔ ان کا دھرمشیلہ کینسر اسپتال میں انتقال ہوا۔ دہلی کے سر گنگا رام اسپتال اور گروگرام کے میدانتا میڈی سیٹی اسپتال میں بھی ان کا علاج ہوا تھا۔ وہ 56 برس کی تھیں۔ ان کے اہل خانہ میں خاوند اور دو بیٹیاں ہیں۔ ان کے خاوند پرمود کمار بھی صحافی ہیں۔

تقریبا بیس برسوں تک یونیوارتا سے وابستہ رہیں۔محترمہ نیلیما نے جموں کے بیورو انچارج کی ذمہ داری بھی ادا کی تھی۔ محترمہ نیلیما کے انتقال سے دہلی جرنلسٹ ایسوسی ایشن نے اپنے دکھ کا اظہار کرتے ہوئے انہیں خراج عقیدت پیش کیا ہے۔ ایسوسی ایشن کے صدر انوراگ پنیٹھااور جنرل سکریٹری سچن بدھولیا نے کہا ہے کہ وہ تنظیم کی رکن اور سابق ایکزی کیٹیو رکن بھی تھیں۔

انڈین ویمن پریس کور کی افسر ونیتا پانڈے نے محترمہ نیلیما کے انتقال پر اپنے گہرے رنج وغم کا اظہار کرتے ہوئے کہا ہے وہ ایک باہمت اور محنتی صحافی تھیں۔ محترمہ نیلیما بیماری کی حالت میں بھی تنظیم کے کاموں میں مسلسل دلچسپی رکھتی تھیں اور یہاں کے پروگرام میں مسلسل شرکت کرنے کی کوشش بھی کرتی تھیں۔